今季一向威開嘅巴塞隆拿，贏波當食生菜，好衰唔衰上周六西甲，偏偏輸畀同市宿敵愛斯賓奴，咪話唔樣衰！愛奴就係靠倒戈嘅32歲「小活佛」迪拉彭拿梅開二度贏2:1，4年冇入過波嘅佢，都算「佛」光再現咯！嗰邊爭標對手皇馬好似踩多腳咁，主場贏夠貝迪斯6:1，今次巴塞咩面都冇晒！
迪拉彭拿連入兩球
賽前巴塞喺聯賽主場未輸過，當球迷見到美斯、亨利、伊度奧等全部正選之際，諗住穩炒啦，點知伊度奧同亨利兩個光頭佬，唔夠對面嗰個勁；仲要38分鐘有施度基達領紅被逐，打少個即時唔同晒。曾經效力過巴塞嘅迪拉彭拿今次倒戈，好少用頭槌入波嘅佢都可以先開紀錄，爆埋41倍「首球」。
巴塞衰開有條路，門將域陀華迪斯之後又發瘟，直頭開龍門球都可以直接傳畀「小活佛」，呢位光頭仔梗係唔客氣笠射成功啦！原來迪拉彭拿喺05年1月30日對貝迪斯入完波後，喺聯賽足足4年幾未再發市，巴塞都算當黑。巴塞最尾只係靠耶耶托尼破蛋輸1:2，慘逢今季聯賽首場主場敗仗，我求大俠代表捧1.12倍W嘅波友鬧爆你哋！
唔講唔知，迪拉彭拿都係巴塞青年軍出身，由B隊慢慢打上A隊；直到97年有新帥雲高爾來投後，冇位踢嘅「小活佛」終被賣去拉素，今役專誠返嚟魯營玩轉party。
皇馬追近咗喇
愛奴自普捷天奴上任後未贏過，但一贏就贏鑊勁；事關愛奴已27年未試過喺魯營贏波，呢次真係反底合時。巴塞打吡戰落敗已經夠瘀，嗰邊次席皇馬憑亨特拉爾及魯爾梅開二度，加埋希古恩同沙治奧拉莫斯嘅入球，直頭主場大炒貝迪斯6:1，仲要係上半場已開出呢個34倍「主其他」，認真驚人。家陣巴塞得60分，皇馬有53分，差距縮窄至7分，邊個係西甲冠軍仲有變數㗎。
綜合上周六戰果不離歐聯效應，唔係贏唔到就贏一粒收場，好似國米、曼聯、羅馬、維拉利爾等全部小勝，就算皇馬半場贏夠6:1後都勒住唔谷啦。