藍奕邦潛了水兩年，沒露面很久，兩年不見，很多人早已銷聲匿迹，但他對音樂尚有堅持，終由水底游上水面，三月將開三場個人音樂會，在這個演唱會逆市中與六年戰友伍仲衡，一齊做海底奇兵，望為音樂打一場漂亮勝仗。
記者：蒙為亮
攝影：陳盛臣
我係固執仔
藍奕邦=邦 伍仲衡=伍 記者=記
因唱片公司合約問題，藍奕邦足足兩年無推出過新作品，連幫別人寫歌都減產了，新派台的《賴床》那種驚喜度，有種久違了的似曾相識感覺。他笑言這兩年沒枉過，依然不斷作曲寫詞，多得身邊好友支持，其中一位就是這次「藍奕邦三月三天三地音樂會」總監伍仲衡。
邦：呢兩年嚟，好多朋友都叫我唔好放棄，成日SendSMS畀我，叫我出去飲嘢，我想講，其實我無事呀，唔死得，仲寫咗好多首歌。
伍：我知你一定唔會放棄嘅，仲記唔得呀，六年前我在GreenCoffee音樂網站嘅表演台認識你，見你咁賣力將自己音樂公諸同好，我就知你唔會離開樂壇，因為音樂呢樣嘢係玩一世。
邦：你咁講開，即時令我諗番起，2002至2003年，我同你、馮穎琪、徐繼宗、王菀之一齊做商場Show嘅年代，當時唔太紅，但真係好開心，做商場Show零包裝，觀眾可能係買買吓嘢食食吓嘢，單純俾你嘅音樂吸引，企喺度聽你唱歌，嗰種感覺真係非常好，佢哋嘅掌聲係最真心嘅。
伍：絕對認同，不過你把聲咁易認，之後好多人認得出啦。
邦：我把聲好易認定好異形先？
伍：易認呀，一聽就會好入腦，對於一個新人或者歌手嚟講，呢個的確係件好事，你知啦，唱歌入屋好重要，如果唔係啲歌手唔使同唱片公司拗數，Pick邊一首歌啦。
邦：哈，你講緊我呀？我都有試過，嗰次好大件事，氣氛極差。
伍：我都在場呀，原先我想調停，不過最後都搞唔掂，你真係個固執仔。
邦：係呀，我想將最好嘅嘢畀聽眾聽，有問題咩？
記：阿邦今年重新開始，轉咗唱片公司，有無雄心壯志攞獎？
邦：有得攞一定攞，獎項係一種肯定，獎項畀到更多機會我繼續唱歌，講到底，我仲想同其他朋友分享屬於自己嘅音樂。
創作很刻薄
從來被封唱作人，總有種很神的感覺，不多拍廣告、少宣傳、甚少上頒獎台，以靠音樂為生的林一峰、Pancake及藍奕邦正正是這一類人，在旁人眼中總覺超然脫俗，彷彿不吃人間煙火，藍奕邦笑言這是啞子吃黃連，有苦自己知。
邦：外界對我哋呢啲創作人好刻薄，畀創作人一個無形框框，叫得你做唱作人，就一定要自己唱自己寫嘅歌，一定要玩得一手好樂器。
伍：其實呢啲都係一種肯定，我覺得創作人或者唱作人，雖然都俾無形框框罩住，但至少可以掛住呢個名去盡情創自己真正鍾意嘅音樂，點都係一件好事，呢個框框，有辣有唔辣啦。
邦：我其實想講，唱作人都係人，我哋平時都會唱K買衫，只不過特別鍾意音樂咁解啫。
伍：講開唱K，我覺得K歌唔啱你，記唔記得有次我同班Friend拉埋你唱K，你唱咗古巨基嗰首《愛得太遲》，完全無嗰種Feel，搞到首K歌好唔K。
邦：哈哈，可能我把聲真係異形呢，你都唔正常得我好多，平時你都唔出聲，只有講中Topic嘅時候先會長篇大論，你今日做乜咁多嘢講？
伍：做訪問嘛，如果唔係我都費事同你講呢啲，哈哈……
邦：你份人就永遠都係咁直，不過我就好固執硬頸，應該成日都吵吵鬧鬧，點知又會同你Friend到，真係奇怪。
伍：唔怪，因為我同你都係可以伏喺鋼琴面前幾個鐘，而面不改容嘅人。
從天而降的驚喜
三月，藍奕邦將會開「藍奕邦三月三天三地音樂會」，宣傳單張印齊Songlist，看似是欠缺驚喜的老土，細味之卻帶點好嬲又好笑的可愛。這三天音樂會，全在藍奕邦本身意料之外，驚喜程度猶如賭馬仔中三T。
邦：上幾個月，無啦啦有個電話通知我，話康文署叫我做三場音樂會，仲提供埋場地。起初我唔係好信，邊有咁着數呀？仲有啲以為對方玩電話㖭。自己從來都唔係個幸運嘅人，點知打電話番公司，原來真係有件咁嘅好人好事，開心到跳起，即刻打畀你報喜。
伍：你仲第一時間問我，搵邊個一齊玩呢個音樂會，點玩好、Jam乜嘢歌。
邦：哈哈，鬼叫你係我最推心至腹嘅音樂人咩。
伍：你平時真係唔多信人，做歌親力親為，自己一腳踢。
邦：我唔係唔信人，只係要搵一個自己信嘅人好難，自己又有手有腳，咪當學嘢囉。
伍：今次個音樂會，樂隊成員方面由我話事，全部都係有水平嘅樂手，總之三晚音樂會一定見得人，不過唔該你好快啲揀定歌，因為差唔多要Rehearsal。
邦：七七八八啦，想Cover多啲外國Artist嘅歌，而個Mood又要Fit番三月氣氛，所以要多少少時間諗吓。
伍：你覺得三月係代表乜心情？
邦：三月係Hea嘅心情，因為一、二月過年過節，太多節目玩得太癲，需要成個三月調整，Hea夠再重新起步。
伍：咁Hea，咪同《賴床》首歌個Mood好似囉？
邦：歌詞感覺係Hea，不過首歌同音樂會一啲都唔會Hea㗎。
後記
藍奕邦的歌，總散發淡淡哀愁，不知道是曲式效果刻意營造，還是他天生一把多愁善感的聲音使然。訪問見真人，方發覺他如普通一個廿零歲的年輕人一樣，拍照時愛跑愛跳、說話愛搞Gag。在這個賣飛慘淡又不定期被外國樂隊如Oasis、Coldplay圍攻的季節，藍奕邦依然笑得出，對賣票情況依然未驚過，我想，這就是唱作人了吧，商業味，始終少了點。
藍奕邦
2001年簽約SonyMusic成為兼職作曲和填詞人，2004奪IFPI最暢銷本地男新人獎，2004年獲劉德華賞識，替他創作《常言道》；2006年獲劉德華點名出任年度專輯《聲音》專輯監製，曾替張學友、林憶蓮、陳奕迅、容祖兒、楊千嬅等作曲或填詞，至今作品已超過一百首。
伍仲衡
1997年加入樂壇，分別於1998及2000年奪第CASH流行曲創作大賽冠軍及亞軍；1999年，代表香港前往馬來西亞參加第四屆亞洲流行音樂節，曾與他合作過的歌手包括李克勤、許志安、張敬軒、容祖兒、陳慧琳、鄭秀文等等。
藍奕邦三月三天三地音樂會
地點：
元朗劇院演藝廳（3月1日）
高山劇場劇院（3月6日）
沙田大會堂演藝廳（3月11日）
時間：8:00pm
票價：$220、$180、$130
查詢：27349009
