一場金融海嘯，Yen價越來越值錢，由半年前最高水位100日圓兌6.5港元，到𠵱家要兌8.3港元。慘的不只是買重外滙的投資者，時裝界亦有一班日圓苦主──專走日本水貨的潮物店。有潮舖頂唔順貴Yen，為生存搞開倉、擬轉型、由地舖搬到樓上舖慳啲租，甚至關門大吉的亦不少。不過汰弱留強的世界，依舊有日貨潮舖做得穩穩陣陣，一手舖二手店繼續吸水，風暴海嘯都無有怕！
記者：葉雪芯
攝影：陳陶鈞、梁細權
Dary之貴Yen下入貨貼士
1.貴精不貴多，揀啱自己最心水的貨品先買，或者買特別、限量的版本，可以慳唔少彈藥。
2.專買長青款式，因為日本潮流轉得快，兩、三個月一季，如果過季唔興會感覺浪費。
Anytime：日潮龍頭不倒翁
踏入第11個年頭的Anytime，當年憑BathingApe起家，是第一代將BathingApe帶來香港的水貨店。現時店中售賣的日牌皆屬最Top牌子，例如Undercover、CommedesGarcons、mastermindJapan、Visvim等。人稱「猿頭D」、Anytime老闆之一的Dary話，Yen價勁升，生意大約少了10%至15%，各位潮童買嘢少咗，以前見到啱心水就買，𠵱家就一件起兩件止，所以在入貨方面要好謹慎，08冬季貨量已較往年少。叫得做潮店老字號，自有獨門絕招長期作戰，Dary話：「老實講，汰弱留強啫，做唔住的多數係樓上細舖，𠵱家反而競爭少咗。據我所知已經有3執咗笠，如果一向追開日本潮物的後生仔，多數都會嚟我哋舖頭買。一來係老字號，有信心肯定是正貨；二來返貨快，我哋每星期都有新貨，幾乎與日本同步，兩三日後新Items已經可以在店內搵到，比專門店快兩星期，仲平30%㖭！」
必殺技：長期關係＋流動資金
Dary說，做日本潮舖不容易，一來要同日本多個品牌都要保持良好關係，先可以買到最新的貨品，否則大部份日牌公司都不會發貨，這都需要長時間在水貨行內浸淫。二來需要極大量的流動資金，每次都要現金找數，一般細舖如果沒有本錢去頂住浮動滙率，好易執笠！眼見同行不是減價開倉撐一陣，就係一間間消失，Dary都無有怕，仲話從來不靠減價散貨：「我哋係街舖，Walk-in客多，最近仲多咗自由行，加上做咗咁多年有一定熟客底，所以有些客人喺專門店搵唔到心頭好都會過來我間舖買，即使積存咗過季貨都唔係大問題。我哋賣的日本嘢好難減價，因為來貨太貴，如果蝕賣仲肉痛。」
hkit：轉型求存賣美牌
Yen價貴、入貨貴，唔想執笠的求生之路就是轉型，hkit便是其中一個例子。開業5年，初期引入裏原宿牌子，當中更經朋友介紹代理了原宿潮店自家牌子FOOBER。老闆Kit說Yen價近幾季高企，貨物無可避免要Mark高價錢，就算二三線日牌都起碼要$400左右先買到一件Tee，不少潮童寧願加二、三百蚊買件普通款式但較有名的牌子，所以買家自然少。
為求生存，Kit開始轉型售賣美國潮物，現時店舖售賣的美牌包括Famous、Zero、SLAP等，「店內全部美牌都係我哋獨家代理，其實鍾意StreetFashion的人大部份都會選擇美國街牌，而且不少日牌在設計上都跟美國Trend，所以我哋決定轉賣美牌，一來滙價穩定又平，大部份唔使$300就有件Tee，即使賣唔晒的過季貨，開倉清貨都易回本。相對日牌來貨貴、價位高，真係好難去貨。」Kit為保險計，來季的日牌入貨開始減量，現時舖內只剩少量FOOBER存貨，全部搞緊半價清倉，實行要錢唔要貨！
網店1號：開交收店慳租
香港的舖租是全世界數一數二貴，開舖幾乎等於幫業主打工，所以開OnlineShop就最經濟。ConceptShop是本港首間網上潮店，經營9年，開店只作貨品交收中心。老闆Simon說Yen價飆升加上金融海嘯，生意少了三成，歐美客流失得更多，多年來都是十算給客人，現在最少要計十五、六算先有得賺，但Yen價等了幾個月都沒有回落，「有時真係唔想做，賣40件貨，當中有20件都係白做。本身日貨價錢貴，尤其Hi-End牌子入貨都唔敢多，入10件賣9件賺埋都唔夠貼剩低嗰件，蝕賣連成本都搵唔番，又係白做。」Simon說好彩在水貨行內是老字號又有客底，之前97金融風暴、沙士等逆境都捱過，有乜風浪未見過！
網店2號：落柯打才入貨
另一間日貨網上店pitt@auctions，經營方法是只作代購，基本上從潮物以至汽車零件都可幫手代訂，只要有貨品的InternetLink或日本網站的OnlineShop就得。老闆Pitt說，Yen價貴對其生意影響不大，因為大部份客人已消化了Yen貴的問題：「個個自己上網搵晒資料、格過價先落柯打搵我代買，某程度上都預咗會使呢筆錢，不過相比高峯期生意確是少兩成。」Pitt現時主要到日本Yahoo!、樂天等網站代客買貨，收取手續費$50至$500不等，運費由買家負責，現時更在旺角租下寫字樓作交收中心，不必捱貴租！
a.Anytime（23117068）
尖沙嘴加連威老道59B舖地下
h.hkit（28913716）
尖沙嘴加連威老道55號2樓
c.ConceptShop（23761176）
尖沙嘴山林道運通商場226號舖
p.pitt@auctions（92717044）
電郵：mailto:[email protected]