花旗股市上日炒大銀行國有化，但唔係向上炒，而係向下炒，股民驚花旗政府將大銀行收歸國有，咁揸住呢啲銀行股票就會有好大損失，於是銀行股被狂擲，拖低大市表現。呢啲諗法唔係多餘，因為近期已經有幾個重量級人馬提過，包括格林斯潘。
睇嚟花旗股市仲會俾啲銀行股拖低，所以滙控（005）都俾人質，呢個禮拜期指結算，暫時都係唔好掂銀行股。
和黃C輪15825：和黃（013）上周五收40.85元，跌2巴仙，算係跌得少。上周和黃股價逆市造好，幾條短期平均線都升緊上嚟，如果守得住38.50元，反覆升穿42元機會唔細，破位睇46元，可以諗吓隻C輪15825，現價36.5仙，有效槓桿4.3倍，正股升上46元，15825睇59.5仙，正股跌穿38.50元，就沽咗隻輪止蝕。
俊樺