經濟衰退禍延各行各業，連高爾夫球場都大受打擊，原因之唔係公司縮皮，減少員工應酬費囉。高層想話學以前邊打波邊傾生意，梗係no啦，搞到唔少歐洲高球場生意拍晒烏蠅。
據彭博報道，歐洲國家中，愛爾蘭同英國最受影響，兩個國家加埋總共有3000個標準高球場，06年高球收入為兩國GDP進賬51億美金（約398億港銀），家吓高球場冇生意，當然最受害啦。
愛爾蘭部份高球場為咗求存，仲半價吸客，送埋牛扒餐㖭，不過唔係間間都可以維到皮，部份已經關門大吉。
度假村裁員縮皮費
高球場生意減，仲影響埋釀酒商，好似全球最大釀酒商Diageo，旗下位於英國Perthshire嘅高球度假村，已發信要求員工自願離職、放冇薪假、縮減工時或者提早退休，希望減少皮費。