立法會主席曾鈺成呢排去到邊，都俾人問幾時同第二春拉埋天窗。噚日佢出席民建聯九龍西支部團拜時，唔少地區人士都戥佢高興，有位區議員更加口多多，問阿曾幾時派帖？大家咪以為阿曾會扭扭擰擰唔想答，反而好爽快大方咁話：「好快」。但唔好以為佢專程喺九龍西老巢賣大包宣佈婚訊，實情只係搞爛gag，因為佢隨後補充話好快會派新辦事處開幕請帖，令一眾老朋友空歡喜一場，預備好嘅人情又可以儲多陣先。
阿曾噚日好忙，但都特別趕去團拜，除咗因為九西係佢舊地盤，亦可能為撐愛徒李慧琼嘅場。阿曾唔肯評價愛徒喺議會嘅表現，只係話外界反應幾好咪得囉，可能費事其他議會新丁呷醋。