聖若瑟書院噚日為慶祝134周年校慶，搞咗個以「NowShowing（放映中）」為題嘅開放日，八方現場所見，名副其實星光熠熠，唔少校友都係重量級人馬。聖若瑟舊生會亦同場宣佈，成立法律支會，唔少從事法律界嘅舊生都現身捧場，到場嘅律師同法官數目分分鐘多過壹號皇庭，除咗因為有要事臨時甩底嘅夏佳理外，前立法會主席施偉賢、選管會委員駱應淦、余若薇細佬余若海等資深大狀都有到場，而陳四萬姪仔方欣然，原來亦係聖若瑟舊生。
老蘭飲酒度新橋
據有份發起成立法律支會嘅舊生講，今次決定源於一班舊生喺蘭桂坊飲酒時度出嚟嘅構思。佢哋班舊生喺每年四次嘅飲酒會上，發現母校有咁多法律人才，決定搞個支會出嚟，畀啲對法律有興趣嘅師弟，可以喺暑假跟班師兄學吓嘢，睇吓做律師係咪自己杯茶，亦可以幫佢哋立定自己嘅志向。
八方聽聞，聖若瑟其實亦出咗唔少醫學界知名舊生，佢哋睇見法律界嘅校友咁積極，都話想整番個醫學界支會出嚟。其實演藝界都有唔少聖若瑟舊生，好似林海峰、陳百祥咁，唔知佢哋又有冇興趣搞個支會益吓師弟？