經濟唔好，日日都聽到裁員減薪嘅新聞，喺呢段時間，莫講話同老闆講要加人工，相信老闆只係提出今年凍薪唔使減薪同裁員，都已經令唔少打工仔心存感激。
不過，敏妮之前曾經睇過一篇講打工仔要求加薪嘅文章，裏面提出7大策略，其實呢7大策略唔一定適用於要求加薪，敏妮覺得其中有幾個策略，其實係打工仔求生術。
先做後說 規劃薪水
其中文章提到「先做後說」。敏妮記得啱啱出嚟做嘢時，部份前輩級嘅同事都好怕孭上責任，原因係「不在其位，等啲主管諗啦！」結果呢班前輩級同事仍然「不在其位」，繼續喺原本位置，但由於做咗咁多年，又升唔到職，結果就做咗薪酬與職位不相稱嘅高危一族，喺經濟差時，成為最易被炒嘅一群。
敏妮聽過一個企業嘅高層講，出嚟做嘢唔單止要令你老闆覺得物有所值，更要令佢覺得你係超值，underpay畀你，咁每次加薪都會喺優先考慮之列。
另外，文章又提到要「做好一輩子的薪水規劃」。文章話成世人嘅薪金規劃，就好似一場馬拉松比賽，喺前面嘅路程好漫長，重點唔係貪快，而係留前鬥後。
以一世人要打30年工為例，對好多人嚟講，頭嗰20年就算好努力，但所賺到嘅錢，可能佔成世人賺嘅錢唔夠一半；但喺最後嗰10年，賺嘅錢可能超過一世人賺嘅錢一半。原因係首10年係學習期，第二個10年係成長期，到最後10年就係收成期。
好好學習 至有收成
不過，敏妮相信，呢個假設只係建基於有喺學習期好好學習，喺成長期好好發力，先至可以喺最後10年收成。問題係有好多人喺工作時渾渾噩噩，想有好收成？天方夜譚！
溫敏妮
http://wanmanli.com/blogs/