想搵一隻唔使親自搭飛機，玩落已達到身歷其境嘅Game界大作？唔使諗，首選我會揀《人中之龍》系列。上集淨係見過古京都街重現眼前，簡直靚到「揼」一聲；今次返回現實世界，主角桐生又可以過番燈紅酒綠嘅夜生活，最搞鬼嘅係，你可以走入夜總會發掘潛質優秀嘅囡囡，將佢訓練成財，幫你賣身搵銀、打江山！
記者：陳國輝
故事 由冲繩湊女開始
大隻佬桐生一馬棄暗投明，諗住執拾包袱，走去冲繩與養女阿遙開養護中心，同班小朋友過埋下半世。點知！當地又有黑勢力想將佢逼走，令桐生再被捲入惡勢力鬥爭當中；與此同時，湊大佢嘅社團東城會又發生大規模爭端，令佢不得不介入事件，重出江湖。
特訓囡囡成財
老實講，假如你唔係鍾意百分百Clear遊戲嗰種人，大膽講句：根本無必要玩呢一Part！但《人中之龍》最過癮嘅地方，就係以寫實黑社會生活為賣點，如果你又唔嫖、又唔賭，學乜鬼人做社團大佬先！
除咗冲繩，你仲有大把機會返東京神室町，過番以往嘅燈紅酒綠生活！上一集，主角頂多做吓馬伕，或者收數佬呢類小嘍囉，至於今集就追加發掘囡囡呢個環節，你要走入每一間夜總會，繼續媾女，另方面又要發掘一名新女性，幫佢揀髮型、膚色同埋服飾，最緊要係不斷咁Train佢，想塑造成學生妹Feel定係怨婦Feel就睇你喇！總之任務係將囡囡潛質谷晒出嚟，幫你搵大錢！
天啓學防狼絕技
玩過該系列都知，動作元素非常重要，尤其天啓系統更屬致勝關鍵！上集《人中之龍見參》已經見識過，今集都唔放過，最搞鬼一幕係桐生行行吓街時，突然見到路邊有個女仔被色狼從後鹹豬手，佢第一反應唔係救人，而係領略到一招防狼絕技，跟住就變成個人究極招式喇！
你可能覺得，社團打交只係一班人圍住互毆，好鬼老套；但今集除繼承天啓系統外，仲多咗各式各樣騎呢武器，好似大型廣告板、垃圾桶，仲有星爺至愛嘅摺凳，幾乎戰鬥畫面所見到嘅嘢全部可以執起，再加上進入戰鬥畫面嘅時間比上一集更快，撈機唔使點等，都算進步咗喇！
入K房爆咪過關
上集解謎成份唔多，都係嗰句，想輕鬆闖到下一關，只需跟貼地圖箭嘴嚟走，再KO所有敵人就得！至於今集分別唔係太大，照舊每段情節個Map會出現箭嘴教你行，唔驚迷失路；而難度在於劇情內有太多MiniGames，部份直頭一日未贏，一日就過唔到關。其中一個好搞笑，主角需要喺卡拉OK唱歌娛賓，如果未獲合格分數，你休想達成任務；另一款較難玩嘅小遊戲係打Golf，你一開始就要挑戰高手，假如冇玩開GolfGame嘅話都幾難過關。
食住杯麵打
齋睇畫面都知呢隻Game製作認真！唔講唔知，製作人原來與遊戲內嘅實店合作做宣傳，其中印上《人中之龍3》嘅豚骨肉杯麵已經喺日本有售，你話如果香港買到，Fans會幾開心呢！
Profile
機種：PS3
類型：動作+角色扮演
人數：1
發行公司：SEGA
語言：日文
