中國電力新能源（735）股東位位猛料，受惠國策之餘，P/B又吸引過同業，要昅昅。中電新能源最新NAV0.65元，現價（0.31元）NAV折讓52%，P/B0.48倍。祖國同行平均P/B講緊1倍至3倍不等，同樣係新能源業務嘅國策受惠企業，中電新能源，冇理由平一大截。
咪睇中電新能源幾毫子貨仔，集團最終對口單位係國資委，而巨無霸中國海洋石油總公司，亦揸咗集團近13%，股東背景超級猛料。再講，中電新能源年嚟積極發展水電及風電等新能源業務，單係08年半年度（10月底止），已經成功透過新業務虧轉盈2203萬銀，銀碼基數雖則唔大，但有上邊超級大孖沙支持，加埋國策傾斜，嚟緊幾年，集團業績應該有好大增長空間。呢轉先炒P/B，中電新能源追番上祖國同業1倍下限，價見0.65元，現價係咁意都要翻一番。
寰宇燒冷灶博升6成
寰宇（1046）上年6月終止賣盤協商，股價陰亁落，半年計數，再跌多5成，現價5.6仙，已經殘過沙士價。寰宇上年6月底止，總借貸得18萬銀，手頭淨現金1.47億銀，相等每股淨現金9仙，寰宇現價只係淨現金嘅62%水位。再講，集團最新NAV近0.19元，現價折讓上到70.5%，又有NAV墊底。呢轉冷灶煲一煲，短打博寰宇上返每股淨現金值9仙，現價升幅61%，到時嘅NAV折讓，仲講緊52%，實情仲有大把收窄空間。
錢雋