上個禮拜推介格拉斯哥流浪同卡坦尼亞冷W，結果雖然開唔到，但至少開出兩個下盤，幫補到我貼媽子嘅生日飯局。隔籬石兄上期話我孝順同專一，我認，亦要多謝佢讚我；至於話我花弗爛蒲，就見仁見智喇，爛賭應該啱啲。
周日又係畢傑同藍鑽石孖住上畀貼士，自問扒冷門非最強項，惟心得總有啲。今次玩嘅場合係荷甲，阿積士主場對住榜尾禾寧丹，[-2]我唔掂喇，反而對個「半和」幾有興趣。睇番阿積士啱啱先喺歐協盃強陣對完費倫天拿，事隔兩日又打聯賽，上半場未必谷得太盡；再睇佢哋近8場賽事，上半場未試過領先對手；「半和」有成3.1倍，絕對抵買，博禾寧丹頂得住半場，買小小玩吓囉。
博富咸贏西布朗2:0
轉頭再玩法甲賽事，里爾無疑主場成績勇猛，波爾多及雷恩等強隊嚟到都要全失3分；呢場波我同石兄同路，大家都覺得摩納哥有啲格食格味道。我求個5.5倍單W嘅啫，啱晒專吼冷門嘢嘅球迷；石兄同我講買得摩納哥W，梗要買埋波膽喎，大家不妨信吓佢個有16倍嘅1:2。
最後玩波膽作尾門，富咸主場守力有幾勁有目共睹，殘陣嘅西布朗好難破到蛋。呢場波可先鎖定富咸0失球，先取最正路嘅2:0波膽，有7倍；若果早段已領先兩粒，主隊有可能贏4球都未定，34倍值得一試。文：畢傑