前高官苗學禮退休前，因為做房屋署署長爆出居屋短樁醜聞，受千夫所指要為事件孭鑊，不過政府內部唔少AO仍然好尊重呢位前輩。苗學禮𠵱家係幾間新地系公司非執行董事，八方聽聞公務員事務局局長俞宗怡近期盛情邀請佢做新丁AO師傅，開班教導後輩如何做好呢份工。
文筆出色為人稱道
資深AO近年目睹新入職政務官工作表現，都認為要花好多時間、心機琢磨，慨嘆唔知係時代進步，定係社會退步嘅問題。為日後交棒有人，俞宗怡特別情商苗學禮開班授徒。據老資格AO講，苗學禮喺AO界之中向來以文筆出色為人稱道，跟過佢嘅人都話學到嘢。
苗學禮做官時，都有教下屬寫文件同如何主持記者會，秘訣就係發言要清晰、有重點，口徑不能含含糊糊，或者顧左右而言他，望住新聞稿照讀係大忌，壓唔住場就弊。呢啲要求認真高，環顧現今官場真係屈指可數，煲呔、唐唐、鬍鬚曾都未必合格。