呢排啲機票加酒店套餐勁平，搞到小妹心癢癢都想飛番轉。早幾日約咗國泰假期嘅靚女一姐董事總經理Cecilia，問吓佢𠵱家市況同有乜好介紹。唔好睇Cecilia打扮亮麗弱質纖纖，佢經常風塵僕僕周圍飛攞料，去西安、不丹實地考察冇耐，啱啱又去完尼泊爾、斯里蘭卡。
近期有星級酒店套票
Cecilia話，受金融海嘯影響，啲旅客精打細算咗好多，減少咗外遊次數，「家吓咁嘅環境，啲客都希望付出一蚊，攞番十蚊嘅嘢。我哋因應需求，最近推出咗啲星級酒店package，入住五星酒店，價錢就比舊年平咗兩、三成。」一姐仲話，呢期最抵嘅三亞三日兩夜套票，入住三亞灣假日酒店只係賣$1,299。
又好似西安導賞遊四日三夜套餐，住嘅酒店係西安嘅索菲特人民大廈，唔單止可提升到豪華房同延遲退房，仲包埋一日嘅私人導遊，貼身帶客參觀兵馬俑同華清池等景點，都係$2,399。
深入探索兵馬俑五號
市務部經理Josephine補充話，玩得刁鑽啲，就有個三日兩夜嘅西安皇陵探秘之旅，套票$5,700，由私人導賞帶領深入兵馬俑五號。Cecilia好興奮咁話：「我喺博物館揸住幾千年嘅文物嚟睇，手都震埋。」此外，一個三日兩夜北京帝王生活搜秘套票，可以去到百年來未對公眾開放嘅亁隆御書房重華宮參觀，四人同行價每位$7,400。
逢周六、周日刊出
電郵：mailto:[email protected]