初春二月，陰晴不定，發展局局長林鄭月娥約議員出海，仲要帶埋手下土木工程拓展署、地政總署、規劃署等幾十個官員隨行，咁大棚人上船，當然唔係維港半天遊咁簡單，而係要向議員介紹維港兩岸多項大型基建進度，了解最新情況。
同舟共濟免臨渴掘井
出嚟行嘅人都挑通眼眉，高官空群而出陪遊船河，又點止風花雪月？因為多項大型基建都要議員投票撥款先可上馬，否則就企晒喺度，所以官員先要咁勤力拉票。民主黨卿姐心直口快，當場踢爆林鄭，「唔係拉票，搵鬼信咩！」林鄭被煲呔盛讚係「好打得」高官，原來佢亦「好撐得」，喺船上死撐佢哋並非咁市儈，強調政府做嘢唔係咁短視，希望大家有長遠合作關係云云。
美國國務卿希拉莉訪京，同溫總互拋書包，溫總話要同舟共濟，希拉莉就話做人唔好臨渴掘井。八方估唔到林鄭咁快就透徹領悟領導人指示，拉議員坐埋一條船，意味大家同舟共濟，議員唔批撥款阻止基建上馬，就開創唔到職位，即係對市民唔住，政府俾人鬧，議員都難以卸責；而為免到投票前一刻先拉票箍票，梗係早啲做游說工夫有着數啦，領導人都話唔好臨渴掘井，林鄭預先開定口井，第日有需要時就唔怕冇水到。
噚日維港遊本來有十幾個議員報名，實際得八個人上船，唔知係咪怕暈船浪。公民黨陳淑莊有自知之明，預先啪定暈浪丸，先至可以避免出醜。現場直擊者報料，雖然維港風大浪大，吹到林鄭頭髮亂了，但佢都面不改容屹立不倒，令人驚嘆佢好打得、好撐得之餘，原來亦十分吹得。
船經皇后即鴉雀無聲
遊船河期間，官員指點基建工程如數家珍，不過船經中環皇后碼頭原址對出海面時，據講卻忽然鴉雀無聲。佢哋梗係冇嘢好講啦，皇后身在何方？天星鐘樓如今安在？呢班高官心知肚明，大家都係出少句聲，默默悼念天星、皇后算了。
噚日一齊上船嘅，仲有前副廣播處長傅小慧，原來佢調離香港電台後，轉到發展局做副秘書長，返新職半個月，佢話新上任初時主要睇文件溫書，出海拉票算係最緊要嘅任務。
mailto:[email protected]