伸手助人協會噚日都有邀請毓民幫忙賣餅籌款，好多長者見到毓民嗒晒糖咁，大讚多得佢掟蕉，先至幫佢哋爭取到增加生果金，毓民獲讚鬆毛鬆翼，即場向詠春高手鬍鬚曾下戰書，指鬍鬚曾早前揚言乜蕉都接到，社民連三子喺星期三，趁佢讀預算案時，一於三蕉齊發，睇吓佢接到邊蕉！毓民又話三人有可能突襲鬍鬚曾，搶走佢本預算案，等佢冇得讀，企喺度獻世。
港台噚日有新節目《激辯》，請咗毓民同葉劉上去嗌交，葉劉寸毓民應面對現實，無謂再嗌爭取2012普選，毓民話凡事有可能，當年嘅掃把頭，今日都留直髮扮良家婦女；意氣風發推銷23條嘅葉劉，邊個估到佢會辭職落台？所以話呢，呢個世界冇乜嘢係唔可能嘅。