上個禮拜同畢傑合作扒冷，未有建樹，唔緊要，話明扒冷我哋要嘅係平地一聲雷，一次中到應就夠晒數，希望就係呢一鋪。
先攻一場法甲波，睇好摩納哥作客里爾贏波，5.5倍客W固然有得諗，另外再博個該隊小勝2:1嘅波膽。講近況，摩納哥似乎真係唔及對手，但其實名氣勁過對方好多，睇埋里爾近6次迎擊摩納哥都贏唔到，既然有數據支持，堅定我捧客軍嘅信心。
再者，里爾最近失球數字增加，動輒失兩球，失去一向予人防守穩健嘅作風。摩納哥有位攻擊重心利卡達近6場聯賽入4球，近況唔錯，希望佢今場可以做財星。
拿玻里熱拿亞鬥癲
講到扒冷膽，意甲其實偶然都有好嘢，好似熱拿亞上次就同費倫天拿合製3:3激戰，相信熱拿亞今次鬥求勝心切嘅拿玻里一樣會鬥得好激。熱拿亞有守將古斯比比亞華停賽，增加失球機會，不過拿玻里後防唔見得穩，呢場吼個2:2。希望兩軍阿根廷射手，即係拿維斯同埋迪亞高米列圖都做到嘢啦。睇熱拿亞上場有頭威冇尾陣，今次冷吼佢哋領先但最終都和波。
最後一場用埋喺葡超推介嘅拿華勝1:0，理據已於另文提及，唔重複。文：藍鑽石