澳門政府發咗癲，隨時唔畀港人入境，八方噚日寫信畀澳門鏵哥，問佢係咪要700萬港人一人一信問佢攞定個入境權先，因為每個港人都有機會被拒入境；呢個建議一呼百應，原來好多香港市民都有切身感受。
讀者Annette同八方講，佢兩年前陪媽媽過澳門探朋友，入境時卻被拒入境，關員冇解釋，只係叫佢返番香港。Annette自言一介良民，從無犯案，唔識政治，亦冇任何不法背景，事後佢去信澳門治安警察局投訴要求解釋，對方覆稱係按《內部保安綱要法》阻止佢到澳門，具體原因隻字都冇。自此佢絕足澳門，免得自討沒趣。由此可見，澳門神經質入境政策幾咁趕客。