號稱「世紀經典大宅」嘅火炭御龍山，舊年開賣時創出新界天價逾20,000蚊呎，一般單位都要成8,000蚊呎，兩房單位入場費閒閒哋要500幾萬元。時移世易，當日入手買家隨時未收樓先變負資產，唔想上會就要蝕讓。
85%尾數未付
有個買家出奇招試圖甩手，八方發現有人喺一個以物易物網站上，提出以一個御龍山五座極低層山景戶，換一個現契市區屋苑車位。據知單位售價565萬元，買家稱已付15%首期，即係大約85萬元，餘下85%由接貨者負責。
如果以一個市區屋苑車位售價約25萬元計，假如有人真係用車位換單位，即係可以平60萬元買入呢個御龍山「大宅」，粗略計呎價都要7,000蚊，而根據地產代理資料，𠵱家御龍山放盤平均呎價6,000蚊左右。換盤是否值得，有數得計。
八方喺網上未見有人提出用車位換單位，有網友想用膠鴨仔、骰仔、偷拍筆或Armani全新男裝袖口鈕交換，通通被拒。單位業主同某地產代理高層同名同姓，八方問過佢是否有盤換，佢一時話八方打錯電話，一時話冇咁嘅事。