鏵哥：
很久不見，近況如何？你做到今年尾就做足兩屆特首完成10年任期，相信唔會有腳痛惡疾要提早拜拜。
閒話少說，澳門向來係香港人短敍勝地，可惜近嚟好多民主派人士坐船過大海，臨門一腳被打回頭，連已申請採訪嘅記者都遭殃，只由出入境事務廳發出一紙「拒絕入境通知書」，告之以「內部保安綱要法」將佢哋拒諸門外，解釋欠奉，迷離之處迷過迷債。
根據澳門律書，內部保安綱要法主要目的係防止跨境犯罪及國際恐怖主義喺境內活動，點睇班得把口民主派、揸支筆嘅記者都唔係恐怖分子，何解澳門如臨大敵呢？曾被拒入境嘅民主黨員何淑萍早前去澳門探朋友不得其門而入，無奈之餘，嘥佢時間蝕埋船飛錢更氣頂。
佢話畀八方知，出入境事務廳職員稱愛莫能助，只係同佢講，如果下次唔想再蝕船飛錢，去澳門前可以先寫封信畀出入境事務廳，說明擬入境日期、目的，如果開綠燈就會覆信，否則就無謂白行一趟。八方一直以為有香港身份證就可以過澳門，方便到可以即興式「闖關」，要先寫信才買船飛，真係開埠奇聞。
澳門律書指鏵哥你係澳門內部保安最高負責人，即係乜都由你說了算，由於𠵱家澳門失驚無神隨時落閘，即係每個香港人都有機會被拒入境，因此八方冒昧代表700萬香港人請問鏵哥，是否即日開始去澳門前都要先寫信？如果係嘅話，八方就呼籲700萬人一人一信問你攞定個入境權先，第日萬一自覺有運行，想去澳門搵啲使費，都唔使臨急張羅吖嘛。
對於八方呢個建議，唔知鏵哥你意下如何？八方去澳門買手信多，禮尚往來，送番盒「黑名丹」過你，呢隻嘢原產地北京，澳門官員死口話冇收過，香港官員亦從來唔敢拎出嚟，不過係人都知佢存在，怕聽到異見聲音嘅當權者常服，而且會越食越多，衰在副作用係永無寧日。
祝
台安
二○○九年二月二十一日
mailto:[email protected]