上周又中高雲地利和2:2波膽，可惜揀錯隊克魯博過關，如果將伯明翰加埋入去，就真係一戰功成，今次博波膽，取老樸同阿爾克馬爾，冷W吼英冠包尾嗰隊查爾頓。
剛在周中，難得見到荷蘭球隊爭一口氣，更厲害係阿積士同川迪都破到在歐洲賽近一兩季長戰多敗的惡劣客績，荷蘭躉博到條2串1單W者，有近30倍回報，真係乜仇都報晒，亦引證歐協盃非主流易出冷。不過莊家睇得咁淡，馬後炮講，其實小弟都覺得好意外，費倫天拿同馬賽，又唔算係乜嘢好貨色；加上呢兩隊都好想在聯賽打好啲，踢到來屆歐聯，點會10成功力同你博歐協盃呀！
樸茅食得住史篤城
言歸正傳，喺得呢個欄寫，最啱博下游球隊反底，我重心都係選英冠賽事，捧長期沉底的查爾頓；查軍開季至今除咗原領隊柏度炒咗外，班底幾近面目全非，上周六剛結束連敗，主場贏普利茅夫，若然今場再贏，將有機會壓倒季初已話「九降」的修咸頓，離開多月來的包尾位置。照目前人腳，個人認為最終應可護級成功；對手班士利主場已兩連敗，亦不是甚麼好貨色，查軍3.25倍W抵捧！
波膽過關已連續兩期收錢，今次再博冷啲，先取樸茨茅夫，上周用新領隊令人眼前一亮，用回傳統英式踢法，作客對頗硬淨的史篤城，我相信可格食格。
至於荷甲新霸主阿爾克馬爾，上周唔贏燕豪芬有點不值，周中不用踢歐洲賽，唞多日後作客到主場恰唔到強隊的荷華高斯，又似開回2:0、3:1呢類正路波膽。
文：蘋果波神