漢學泰斗饒宗頤獲國務院聘為中央文史研究館館員，由於佢年紀大，唔方便出席今年1月中喺北京中南海舉行嘅聘任儀式，中聯辦副主任李剛前日去香港大學，向饒老轉送聘書。呢次係國務院第一次聘任香港學者做中央文史研究館館員。有人指中央文史研究館係中央重要智囊，因為研究員可直達天庭，直接向國務院領導人發表政策意見。
92歲嘅饒老接聘書時都有啲激動，好感謝國家嘅重視，又形容呢份聘書，係代代傳承嘅「傳世家寶」。
港大校長徐立之代表大學恭賀饒老，又指獲中央文史研究館聘任者，都係德高望重學者或藝術大師，被學術界譽為「國際矚目漢學泰斗」嘅饒宗頤實至名歸。