錯要認，俾人打要企定，𡃁坤呢句說話幾時都咁啱聽。我同拍檔牛兄喺〈早飛倉〉千揀萬揀，幾場心水選一場推介，結果其餘中，重心唔中，真係玩死。
係蘋果讀者嘅話，都見到我早前推介國際賽（巴西、阿根廷）、自由盃（聖羅倫素）及世盃外（美國、哥斯達黎加）全勝，而周三曼聯贏富咸3:0波膽都中埋。唔知點解，本欄唔可以保持旺勢，連牛兄上期揀嘅史特加都賴嘢。衰咗就要認，希望讀者原諒及繼續支持。
道歉完畢，從頭做起，今期揀嘅維爾瓦2.05倍W，信心度達90%。首先，維爾瓦上周作客畢爾包㩒住對手嚟踢，只係欠運被迫和1:1；再對上一場0:3輸畀馬德里體育會，無可否認屬對方反底之作，早失波輸壞個頭，係大敗原因。
維爾瓦主場專𡁻同級隊
到周日迎艾美利亞情況唔同，呢場係下游隊搶分嘅護級大戰，話就話維爾瓦𠵱家以25分排喺16位，但基達菲（12位）、艾美利亞（13位）同希杭（14位）都只係得27分，主隊贏到呢場排位將截然不同。事實上，維爾瓦未輸畀馬體會前，主場曾做出4連勝紀錄，對手都係紐文西亞、奧沙辛拿及希杭等同級隊，證明對實力相若隊伍，維爾瓦唔會輕易主場失分。
維爾瓦除咗守將比圖續養傷外，周日可排最強陣出戰，反而艾美利亞離開主場就威力大減。艾軍暫作客成績1勝2和8負，係全西甲第2差，每場更必有失球；最重要係今周有卡勞烏捷、般奴沙托及文尼3主力停賽，輸波機會真係好大。
配腳揀法甲里昂作客砌低南錫。睇番上季南錫主場好惡，但今年已冇貨賣，里昂近3季對南錫8勝1和，單W及[-1]的「客勝」可取。文：畢傑
早飛王貼士
星期日24 維爾瓦vs艾美利亞
首選：維爾瓦勝（2.05）
次選：維爾瓦半勝（2.6）
冷選：維爾瓦勝3:1（16）
早飛倉
主菜：星期日24維爾瓦勝（2.05）@1,500
渾水摸魚過關：星期六46里昂勝（2）x星期六54阿爾克馬爾勝（1.53）x星期日7富咸勝（1.7）x星期日31基達菲勝（2）4x1@500
今日早餐價錢：-$2,000
上日賺蝕：-$1,500
早飛倉結餘：$83,564
規則：$100,000本錢，每日買早報最多動用$5,000，最少$1,000，逢周二、五見報。
周末焦點
星期六2 阿士東維拉vs車路士
本周英超最矚目戲碼，由第3位的維拉迎擊第4位的車路士，兩者只相差2分。維拉周三於歐協盃迫和莫斯科中央陸軍1:1，體力較輸蝕，車仔下周則有歐聯大戰祖記後顧。
星期六55 巴塞隆拿vs愛斯賓奴
巴塞隆拿市打吡大戰。早前聯賽10連勝的巴塞，上周終賽和貝迪斯2:2斷纜，還有恩尼斯達因傷缺陣兩周。愛斯賓奴新帥普捷天奴上任後未嘗勝果，兩軍早前在西盃8強碰頭。
星期日19 利物浦vs曼城
紅軍有謝拉特傷癒復出，惟下仗有歐聯大戰皇家馬德里後顧，該隊長或先列後備；至於近6次聯賽迎曼城得5勝1負，5場勝仗俱小勝一球。曼城則剛戰畢歐協盃歸來。