大馬男歌手品冠前晚喺紅館舉行「愛情在香港轉機！品冠香港演唱會09」，雖然開三面台，但入座率麻麻只得七成，空位部份用黑布遮住，加上尾聲時觀眾陸續離去，馮仁昭都覺得有啲礙眼。不過，品冠人緣好好，梁靜茹、李璨琛同女友、蘇永康以及台灣樂隊五月天成員阿信都嚟捧場。
發表愛的宣言
演唱會請嚟戴佩妮同光良擔任表演嘉賓，品冠同光良自02年無印良品解散後，前晚第一次同台獻唱，氣氛融洽。開始時，品冠用廣東話夾雜普通話講：「金融海嘯大家都來捧場，多謝晒。」之後佢行近蓋住黑布嘅觀眾席，佢望一望後笑住話：「呢度風凉水冷，好凍。」其後梁靜茹同阿信上台獻花，品冠請梁靜茹客串唱番首歌，佢又強調同梁靜茹冇不和，反而有啲曖昧喎！
品冠又喺台上向女友J小姐發表愛的宣言，佢話：「近年在我生命中有很重要的人，我和她認識了很久，今日她也有來，只是不好意思被人知，多謝她這幾年的鼓勵，我會好好珍惜她。」觀眾聽完猛叫佢求婚，好鬼搞笑，最衰品冠扮聽唔到。
慶功宴上，品冠講到入座率麻麻時話：「可能香港觀眾唔太認識我，又冇乜宣傳，金融海嘯都有啲影響。」
