立法會係口水橫飛嘅地方，一班議員成日都會拗到面紅耳熱。港台可能覺得一個辯論平台唔多夠，嚟緊21號星期六起推出全新節目《激辯》，邀請四位嘉賓包括卿姐、葉劉、毓民同劉江華齊齊舌劍。呢四位議員有幾talk得，都毋須八方多加註腳。
先禮後兵，港台噚日特別邀請四位嘉賓聚首一堂，希望舌戰前可以輕鬆傾吓偈。為咗隆重其事，卿姐仲特別帶咗支印有佢嘜頭嘅紅酒到場，引起全場目光。呢支獨一無二嘅「EmilyLau牌」原來係卿姐生日時，一位好朋友送贈嘅生日禮物，噚日特別同在場友好分享。同卿姐交手十幾年嘅劉江華都有嗒番杯，佢仲形容同卿姐係「合作夥伴」唔係對手。