一紮襟擺嘅花，大概可以插3、4日，換言之，情人節收到嗰紮花，今日應該去咗堆填區！喺經濟好時，一擲千金𠱁人開心，未必會感到好肉赤，但經濟唔好，用幾百甚至幾千蚊紮花，一個禮拜唔夠就要送去堆填區，真係幾浪費。
公司乘機sell壽險
前排有美國保險公司透過網上調查，訪問咗1000個18歲以上嘅美國人，問佢哋今年點慶祝情人節，結果有七成人話寧願唔慶祝，換取更大嘅財務安全。調查仲顯示，有近四成人考慮減少買貴價情人節禮物，有兩成人更話唔諗住送禮物畀情人。美國係金融海嘯嘅風眼，難怪咁多人有得揀，都寧願留多個錢傍身。當然個調查係由保險公司做嘅，調查結果咁一面倒，梗係有原因。
保險公司查實係用呢個調查，推銷佢哋嘅壽險產品，嗰間保險公司CEO話，買保險最主要嘅原因係，你愛身邊嘅人，想佢得到財務上嘅保障，所以情人節係考慮買壽險嘅理想時刻。CEO仲話，花會枯萎朱古力會食晒，但壽險係最持久嘅禮物，可以為你愛嘅人提供好多財政保障。
敏妮將呢個survey同CEO講嘅呢兩句說話，畀公司位新嚟嘅小妹妹睇，佢好不屑咁話：「係就係好窩心，好難想像情人節sell保險囉，都係清明節拜山嗰時sell直接啲噃。」
欣賞「實際浪漫」
不過，推銷手法夠唔夠高明係一回事，買壽險係另一回事，雖然小妹妹未必識欣賞呢啲「實際浪漫」，但就算識得欣賞都唔係要即刻去買。
當然你有大把錢唔志在就另計，否則壽險都係一種產品，夠用就得，始終利用壽險作儲蓄嘅成效，會比其他投資工具低。有錢留番嚟做第二樣投資，累積更多實質財富畀自己又好，畀所愛嘅人都好，甚至係畀社會有需要嘅人就仲好。
溫敏妮
http://wanmanli.com/blogs/