牛：你就威啦，貼曼聯炒富咸果然「主勝」開出，連3:0波膽都中埋，唔叫你一聲畢爺都唔得，畢爺，你杯奶茶喇！
畢：講威，我又點及得上費Sir，佢啲部署真係出神入化，用老將啲時機真係冇得彈；上仗對打比郡就有傑斯「爆珠」，今次又有史高斯，睇佢勁射搞到舒華沙甩手漏入網，幾次長傳準確無比，邊似30幾歲老將。
牛：你咁講法，周六曼聯又主場對布力般，你又撐「主勝」啦！
畢：咁又未必，始終曼聯已經拋開利記5分，而且下周又要打歐聯，國米絕對唔少嘢；隨時又贏1粒，甚至和波都唔出奇，我反而想博富咸反底。
牛：其實富咸都打得算唔錯，不過今時今日邊隊對曼聯都冇運行啫，周日主場對西布朗，富咸有權攞番3分。
畢：你近期心水都ok啦，上星期話追阿積士，結果都贏飛燕諾兩球，今次仲追唔追？
牛：我有睇阿積士對飛燕諾場直播，阿積士冇想像中咁好，中前場都好亂，如果唔係飛仔打少個，入唔入到兩球都成問題，反而阿爾克馬爾就幾好，周六對荷華高斯，贏得。西甲你強項，周日有冇心水？
畢：初步睇基達菲主場可贏畢爾包，基達菲上仗迫和馬體會，近期個勢好番啲，而且畢爾包高佬中鋒洛蘭迪未必出得番，對攻力影響大。
牛：好，綜合大家心水，整條主客和3串1，富咸W過阿爾克馬爾W同基達菲W，你守尾門，醒定啲呀。