豪華SUV市場一向競爭激烈，鬥豪鬥科技，大勢所趨。最新登場，新一代凌志RX350，改頭換面未夠誠意，焦點係大堆頭加料：超巨型天幕、簡易翻摺椅背、12氣囊、輕觸式免匙系統、VDIM系統……你會發覺，Upgrade位完全不玩花巧，擺明夠豪之餘，仲要以科技加實用搶攻。
記者：黎頌詩
攝影：陳盛臣
Model：Phoepe（StageModel）
內外大變身
改朝換代就當然要有全新氣象，新一代RX350，絕不會叫你失望。由外而內煥然一新，大堆頭科技組合瓣瓣有，針對實用性而不花巧，對用家而言，絕對討好！全新RX350車身比上一代更大，但面相改變，笨拙感反而遞減。固有直欄柵鬼面罩，但外框電鍍部份上方向兩邊延展直達頭燈，高亮度放射式頭燈造型亦配合變化，向上揚起，帶點傲氣，凹凸有致也令車頭變得更有立體感。原本方正簡約嘅側鏡加了有細緻線條嘅指揮燈，而兩邊車身下方亦勾勒了別出心裁嘅線條配電鍍飾邊。整體而言，令SUV本身嘅硬橋硬馬添上幾分精緻。車尾部份則作了微調，除了尾燈造型有所改動外，原有小天線及水撥都消失，都被收藏於小尾翼內。打開車門，更係眼前一亮，因為內櫳鋪排變革得更為徹底。依然以電鍍及桃木飾面營造高級感，不過錶板中控台鋪排跟前作截然不同，中控台跟上方液晶顯示屏所在位置組成半橢圓形，完全甩掉本來嘅方正呆板，三圓跑味錶板則改用投射式，特別之處係中央可顯示由軚環按鈕選擇嘅多項操控模式，科技感跟實用性兼備。
VDIM系統安全第一
配備3.5公升V6引擎嘅RX350，最大馬力277匹，動力上無大躍進，操控性及安全性先係提升着墨點。繼新一代IS車系後，全新RX350亦配備上原本旗艦LS車系獨有嘅行車動態綜合管理系統（VDIM），呢套主動式安全設備，能預計可能出現嘅失控，於事發前介入控制，安全性大提升之餘，行駛時嘅轉向及制動性能亦增強。另外安全氣囊亦由原本嘅9個增至12個，包括前後門玻璃嘅窗帘式氣囊，保護更全面。輕按啓動按扭，喺6前速智能型波箱配合下，巨大嘅RX350輕巧前進，運作驚人流暢，整個車廂平穩寧靜得有點過份，大概有人會覺得少咗啲駕駛嘅質感，不過，回頭一睇，攝影師同Model都舒服到瞓着，應該，呢啲就係大部份人追求嘅享受……
規格
引擎：3.5公升V6VVTi
馬力：277ps/6,200rpm
扭力：346Nm/4,700rpm
傳動：6前速自動波、四驅
查詢：皇冠汽車（25119430）
售價：待定
