孫柏文好明白我哋作為香港人，係一群好慷慨、好有耐性嘅人。不過就算係咁，我都想溫馨提示一吓汪阿姐，你只係差一條好幼好幼嘅線，就會令香港人特別係一班後生仔女，因為你嘅行動，覺得八和會館好離譜，甚至覺得粵劇已經變成香港嘅負累，應該盡快令粵劇呢樣嘢喺香港消失。
八和失地有原因
我住喺深水埗天台屋，每日一打開門，就見到北九龍裁判司署（北裁）。政府要搵方法處置裁判司署，對我嚟講，絕對係我嘅社區問題。作為一個支持自由市場嘅人，我當然支持政府將建築連地，一口氣以拍賣形式賣斷佢。買家如果覺得保留裁判司署大樓有價值嘅話就保留，如果冇就拆。
不過，政府決定以保育形式去處置裁判司署嘅話，就應該以保育為大原則。所以佢判畀一個保育做得好好嘅花旗國美術學院，我可以明白。就係因為咁，我更加覺得汪明荃因為八和會館攞唔到塊地而流淚，令人反感。
老老實實，要贏得香港人嘅支持同尊重，首先要證明畀香港人睇，你做嘢有心機同誠意。當一件產品因過時而賣唔出，發憤圖強令產品可以再有支持，香港人就會尊重。不過如果產品賣唔出時，你只係無所不用其極去迫政府用納稅人嘅血汗去補貼你，香港人就會鄙視你、鄙視八和會館、鄙視粵劇。
劇本同時代脫節
試問，粵劇中人最後一次有心寫一齣合乎摩登香港後生仔女口味嘅劇本係幾時？
汪阿姐因八和攞唔到地而流淚，係流錯淚。其實佢啲眼淚，應該為粵劇中人不肯出一啲觀眾肯睇嘅劇而流。粵劇嘅AndrewLloydWebber在那？
孫柏文
http://phatdat.blogspot.com