地產代理監管局（EAA）行政總裁陳佩珊突然宣佈，同地監局結束6年賓主關係，喺今年7月約滿之後就唔再續約。
董事局決定公開招聘
由於事出突然，市場上有好多揣測，謠言滿天飛，認為陳總裁唔續約係另有內情、健康出現問題喎。
華華梗係要直接向陳總裁求證，佢就話自從03年加入地監局，喺3年前續過一次約，今年又到期約滿，董事局決定公開招聘行政總裁。陳佩珊本來可以報名應徵，但佢話經細心考慮，同睇過一本書後，就決定放棄申請。
究竟係咩書咁犀利，令到佢連做咗咁耐嘅行政總裁都唔撈？陳總裁打開心窗說亮話，原來6年前佢睇咗一本《人生下半場》嘅書，忽然領悟到自己嘅「下半場」，都要做一啲自己覺得有價值嘅事，所以辭咗政府部門份工，毅然加入地監局。
領悟後50歲另有選擇
到近排，佢就讀咗本《後50歲的選擇》，又產生好大啓發，認為自己接近人生呢個關口，唔知生命有幾長，諗到有咩想做而未做嘅事，點都要試一試，於是作出呢個咁重大嘅決定。
被問到有乜係陳總裁最想做而未做，佢就話要「停一停、唞一唞、想一想」，暫時都未決定到，但其中一個心願，係要回饋母校中文大學。最後陳總裁慨嘆自己從未做過一份工有6年咁長，家吓要走，可謂百般滋味在心頭，好真心多謝董事局同各地產業界一直對佢嘅支持喎。
李華華
mailto:[email protected]