今年係公民黨成立三周年，近日佢哋除咗忙住搞百日新政同追住政改唔放之外，仲為一年一度黨慶兼籌款忙到癲。遇着百年一遇金融海嘯，公民黨今年嘅籌款工作難度大增，執委余冠威形容今年籌錢嘅難度同爭普選唔差得太遠，成功揼人心口機會率好低。
公民黨𠵱家嘅可動用現金只可以捱到5月，所以家陣要搏命𢱑銀，下個月17號嘅日本電影《開心直航》首映係今年籌款重頭戲，希望各方善長仁翁可以幫幫手，買多幾張VIP戲飛幫公民黨捱過金融海嘯。雖然小小超係公民黨之友，但暫時冇消息話佢會捐錢，公民黨反而吼實今年嘅首映主禮嘉賓唐英年，希望佢用行動支持之餘，都可以買多啲戲飛「促進消費」。
屋漏兼逢連夜雨，手頭缺水之際，公民黨另一樣頭痕嘢，就係仲未搵到另一個竇口。秘書長陳家洛大嘆由上環搵到去北角，都未搵到心水之選，𠵱家距離5月灣仔現有竇口約滿期仲有三個月唔夠，難怪佢哋好驚到時個黨連個有瓦遮頭嘅地方都冇，未爭取到普選就已經摺埋，所以各方人士有筍盤不妨介紹吓。