大市窄幅上落，全日在13000水平拉鋸，大部份股票只係窄幅波動，成交只得354億元。不過，近期不少細價股俱見異動，昨日廣益國際（530）抽升104%，收報0.047元，最高價更曾見過0.059元。
若能撇除偏見，細價股重現活力其實係好事，因冇人想見到股海死氣沉沉，問題係炒細價股好考功力，既要膽大心細，又要當機立斷，最重要係嚴守紀律，一見唔對路識得跳車。
內地3G網絡應係今年市場熱點主題，京信通信（2342）昨微升0.02元，收報2.40元。該股自去年10月28日低見0.475元後，一直展開大反攻，呈現一個完美的V形反彈，至今已狂升4倍，認真唔可以睇小。
高追易接火棒
京信通信日前升至2.50元後疲態漸現，短線若出現整固，只要守住10日線2.30元應無大礙，不排除整固後可再升，問題係累升咁多，家陣才入市似乎好易接火棒。
方星俠