噚日香港會計師公會開記者會，講吓會計界喺今次金融海嘯扮演乜嘢角色。仲邀請咗被譽為「會計界碧咸」的栢韋文（PeterWyman）同香港傳媒見面。
講到栢韋文成個碧咸咁，仲身為羅兵咸永道公共政策及規管嘅全球主管，應該智慧與外貌並重啩。點知華華見到真人，發現佢除咗係男人同操道地英國口音之外，真係同萬人迷碧咸完全冇一忽相似；反而同科幻片《廿二世紀殺人網絡（Matrix）》系列入面嘅奸角，由曉高韋榮（HugoWeaving）飾演、人見人怕嘅AgentSmith有八成相似。
不過栢韋文就冇AgentSmith嘅殺氣，仲好好笑容，對傳媒好友善。記者問多多問題，佢都樂於一一解答，又成日提住華華，話如果佢講得太混亂，可以隨時叫停佢（StopmeifIconfuseyou）。
似萬人迷受傳媒歡迎
其實栢韋文之所以叫「會計界碧咸」，係因為佢致力推動會計發展，又為會計業同全球監管機構合作出力，加上性格親民，令佢好似碧咸咁廣受傳媒歡迎啫，同外表冇乜關係。