香港大學宣佈向五位傑出人士頒授名譽博士學位，有香江第一健筆之稱嘅《信報》創辦人林行止獲得名譽社會科學博士榮銜，係繼查良鏞之後，第二位獲頒呢個學位嘅報社創辦人。八方作為同業，與有榮焉。
港大頒呢個榮銜，對《信報》嚟得好合時。《信報》近期正值多事之秋，俾電盈私有化單嘢株連，有讀者指佢哋冇積極批評大老闆小小超，質疑偏幫電盈，搞到編輯部要發聲明澄清。再早一排，《信報》宣佈由小小超愛將袁天凡出任社長，未上任就由於跨媒體掌控嘅質疑而辭職。港大喺呢個時候公佈頒授學位畀林行止，可以冲喜一下。
第一健筆著作過百
唔開心嘅嘢，過咗去就算嘞，不如睇吓林行止有幾威先。港大新聞稿話，68歲嘅林行止，原名林山木，喺內地出生，60年代初期加入《明報》，之後喺英國劍橋工業學院讀經濟學。佢69年回港，參與籌辦《明報晚報》，主管經濟版，之後喺73年自立門戶創辦《信報》，佢寫社論〈政經短評〉25年，分析香港同國際政經形勢。到97後，香江第一健筆轉寫〈林行止專欄〉；多年嚟，佢嘅文章收錄成書超過100本。當然唔可以唔提林太駱友梅，一直同佢喺《信報》合作無間。
好多人推崇林行止嘅社論喺香港無出其右，聽講唔單止回歸前後嘅港府，就連朱鎔基做緊總理時都同人講，經常要追住〈政經短評〉嚟睇，話林行止無論寫政治同經濟題材嘅觀點都值得參考喎。八方仲好記得03年7.1遊行，林行止夫婦首次上街抗議，同50萬人併肩反對23條立法。
最近《信報》另一健筆曹仁超已經減產，林行止卻講過辦報至今幾十年間，完全無意卸下文人寫作不輟嘅職份，佢嘅專欄繼續一星期登五日。雖然冇話過退休，但近幾個月林行止夫婦已甚少喺報館露面，林太出過電郵話今年1月起辭任社長同董事會聯席主席職務。八方同好多讀者一樣，希望林行止呢支Superpen「寫」意人生，繼續為香港論政論事。
五人同獲港大榮銜
獲港大頒授名譽博士嘅仲有四人，當中國際年輕鋼琴演奏家祈辛獲得名譽文學博士，另外三人獲得名譽社會科學博士，包括人大常委范徐麗泰、「何鴻毅家族基金」創辦人何鴻毅，同埋港大醫學院名宿莫慶堯醫生。頒授儀式下月底舉行。
mailto:[email protected]