英超曼城陣容鼎盛卻位居中游，最大原因係巴西幫同領隊曉士不和。好似早前嘅國際友誼賽，羅賓奴同艾蘭奴面對世界冠軍意大利防線，各入一球奠勝；但4日後聯賽0:2負樸茅就冇貨交，仲唔係擺明玩嘢？
為巴西幫解鄉愁
我求大俠最近同位索馬里海盜網友玩MSN，佢話有架裝住沙嘅大貨輪經過，話啲沙係運去英國畀羅賓奴，我當堂鬧佢吹水。點知英國《太陽報》周四話，羅賓奴真係運緊沙嚟自己間豪宅；打算將後花園鋪上沙，得閒踢沙灘足球，紓緩思鄉之情。
咪話我求大俠小人之心，羅賓奴係想同艾蘭奴、哥路巴，喺曼城陣中建立「沙灘之城」就真，擺明為脫離領隊曉士搞獨立！同時，咁做亦係話畀大老闆蒙蘇聽，一係支持自己獨立炒曉士，一係夏天賣走巴西幫，你係蒙蘇會點揀呢？
曉士搵羅賓奴講數
話時話，究竟批沙喺邊度運嚟呢？英國《太陽報》同我個索馬里網友都冇講。依我求大俠猜測，最大機會係遍地都係沙嘅中東！亦即係蒙蘇特登運去討羅賓奴歡心（仲有邊個咁無聊，租架大貨輪運沙呀！），照咁睇嚟，領隊曉士個位都危危乎啦！
曉士都已經知驚，日前歐協盃32強首回合作客哥本哈根前，對《每日郵報》講：「對樸茅賽後，我同羅賓奴簡單傾過，呢幾日去國外正好有機會再傾（唔通平時冇咩機會傾？）。」曉士仲話羅賓奴英超客場比賽經驗少，因此影響對樸茅時嘅表現。
溝通係兩方面嘅，而且要投其所好。中國人講數鍾意去茶樓，巴西人就去足球場；既然羅賓奴同巴西幫想玩沙灘足球，我求大俠就勸曉士得閒練下沙灘波，唔係仲可以請教沙灘足球之王、前曼聯隊友簡東拿，咁就包你事半功倍啦！