幾位老友定期吃晚飯，點知基金Ｆ搞錯咗日子，臨時失場，於是基金Ｋ唯有單人匹馬，應付大家要討論嘅股市嘅問題。基金Ｋ素來係基本分析學派，注重數據與歷史經驗，佢認為大跌市應有三次大跌，第一跌係○七年十月高峯期之後反覆下滑，第二跌係○八年九月中雷曼破產之後發生金融海嘯，全球股市崩潰，直至現在。第三跌會在何時發生？基金Ｋ話任總裁所言之海嘯第二波，未必係危言聳聽，照佢自己之理解，新嘅威脅會係通縮，因為各國人民消費銳減，需求疲弱，連帶所及，航運與空運大受打擊，商品價格（除咗咖啡期貨）不振，各國利率又將近減到零，通縮打到埋身嘞。股票樓市最怕通縮，故此基金Ｋ估計股市還有終極一跌，先至到底。
大家聽到連肥叉燒、靚燒鵝都幾乎食唔落，基金Ｋ講通縮，財務Ａ靈感忽至，話今後最怕頭文字Ｄ。何謂頭文字Ｄ？據肥仔Ｋ講過，乃係一套日本飆車影片之名字，頭文字Ｄ按字義就係InitialD，以Ｄ為先之英文單字有好多，財務Ａ話以後見到都怕怕，佢隨口噏就有Deflation（通縮）、Depletion（消減）、Debt（負債）、Disintegration（散晒）、Divestment（沽出投資），不幸碰上上述咁多事情之後，財務Ａ話一個人就會感到Desperate（絕望），直至毀滅（Destruction）。
呢類頭文字Ｄ，認真唔盞，投資銀行家Ｗ話世情如此，由極高層至最低層員工，隨時可以被炒魷魚，佢幾位大大老闆已經執埋包袱，自紐約辦公室失蹤咗咯。罷罷罷，講得咁悲做乜吖，正是醉酒當歌，人生幾何，譬如朝露，去日無多，咁啱甘老闆贈送一枝靚housewine紅酒，一於一人一杯，飲晒佢。銀行Ｗ笑曰：「海嘯時期，我哋居然仲飲紅酒，送燒鵝，吃肥叉，咬清湯腩，實在係decadent（頹廢），可能會畀啲道德塔利班批判到nodefence（冇得辯護）。」理得咁多吖，照飲可也，左丁山飲得最少，清醒地問一句：「各位有冇揸車？」咦，人人都話搭的士，可見有備而來，若不然，要上蘭桂坊搵BeijingClub求助。