三色台有個「至暈」飯局，由陳總經理出任主持，同嘉賓邊食邊訪問，該台小生姐仔都以有得上飯局為榮，甚至視為上位力捧嘅指標。南華班主羅傑承先生，近期就喺球會官網度搞個「南華飯堂」，星期二晚出到第3期，繼文彼得同歐陽耀冲之後，巴西外援卡卡就成為第3位同羅生撐枱腳嘅少林兵，仲大嘆貴價意大利菜㖭！
卡卡似施丹？
講真呢個飯堂idea認真創新，球迷可以透過「南華飯堂」，知道唔少球員私生活同心事，喺呢次飯局中，卡卡都爆咗好多鮮為人知嘅私人事，好似佢前女友同「大哨」朗拿度前女友係好朋友，4人經常一齊玩，朗拿度又介紹過球會畀佢。而卡卡全名原來好堅，叫卡卡法拉利，祖父仲係意大利人；佢仲自爆經常被球迷誤認為係施丹㖭，「飯堂」受歡迎，唔怪得累積瀏覽人次已突破1,000萬喇！
不過唔知係唔係我求大俠心多，暫時出現喺「飯堂」嘅3位球員，都被視為羅生愛將，文彼得俾羅生力捧，之前更有意足球同娛樂圈雙線發展，歐冲更被笑稱為「神之子」（羅傑承契仔）。而卡卡雖只為南華上陣兩次，但身價高名氣大，反觀其他巴西兵，迪天奴同史高斯上季為南華捧3冠，都未上得飯堂住。羅生講過會逐一安排球員上飯堂，希望唔好搞到好似三色台之前搞頒獎禮咁，眾小生姐仔爭獎爭到有不和面左左就好嘞！
豪食貴價菜
我求大俠只係打工仔，講身家講生活品味，拍馬都追唔上羅生；食完貴價潮州菜，千幾蚊隻響螺、幾百蚊隻凍蟹，之後又大嘆名貴日本菜；今期更誇張，賣百二蚊嘅海鮮湯，好似兩啖就飲完，成五百蚊叫碟烤蝦仔，間意大利餐廳仲要大牌到要熟客有經理手提電話先落到Booking。𠵱家金融海嘯，打工仔都勒緊褲頭，為普羅球迷着想，羅生下次可唔可以介紹啲平民化啲嘅美食呢？我知道銅鑼灣有間車仔麵都好出名㗎！
想睇羅生同卡卡嘆意大利菜，請瀏覽： http://hk.myblog.yahoo.com/scaablog/
