唐英年司長傳召滙豐亞太區主席鄭海泉與電盈董事總經理艾維朗到政府總部，傾吓裁員問題。佢哋究竟講乜，不得而知，但事後就有消息人士放風，顯然係為特區政府及唐司長造勢，顯示吓政府好關心市民就業問題，關心勞工。呢啲門面功夫就係政治化粧師嘅傑作嘞，起碼滙豐與電盈畀番幾分薄面，就算裁員也要推遲一段時期。但係長期嚟講，企業各有算盤，真係要裁員嘅話，誰也阻擋不了，各位睇吓日本企業已丟棄終生僱用制，呢間裁兩萬人，嗰間裁一萬人，日本政府不置一詞，冇搬出日本倫理、企業道德、社會責任呢一套嚟向日本商社施壓，就知道衰退潮流阻擋不了。
有老友講唐司長代表特區政府伸長隻手，赤裸裸干預企業運作，有啲肉酸，如果曾特首唔係拍枱鬧銀行，將雷曼事件搞到咁大，銀行未必要裁員咁多，咁深入。呢個問題好難答，不過如果睇番從前，港英政府在二十世紀九十年代之前，早已秘密干預，情況比唐司長召見大班，有過之而無不及。以前嘅最高權力架構──行政局嘅成員包含最大英資財團嘅大班，就係滙豐與怡和，再加上華人大亨，如周竣年爵士、周錫年爵士、馮秉芬爵士、簡悅強爵士、利銘澤等等，正式係官商勾結，經濟有乜大事，早在行政局傾掂先至出籠，當年怡和擁有港燈與電話公司，電車與天星小輪，乜嘢公用事業加價嘅決定，唔會有甚麼諮詢，邊度會有布政司（今政務司）召見滙豐、香港電話呢啲事情吖，況且電話公司係壟斷生意，「電話」員工如公務員咁嘆，絕無裁員問題。
而今之行政會議成員，冇邊位有權威性及商界代表性，兼且大口，有事不保密，仲要周圍放風，行政會議嘅威信，蕩然無存，政府要干預企業，遠遠不如以前咁順滑與保密，而企業是否真的甘心聽話，好有疑問。一言以蔽之，以前港英行政局冇民主性，但有權威性及實效；現在嘅行政會議，同樣冇民主性，而同時冇威信，冇公信力，冇實效，嗚呼哀哉。