因為中移動（941）話事人王建宙（圖）講過，會喺新興市場搵機會，而母公司又確實喺巴基斯坦買咗間電訊公司，所以，𠵱家啲第二、第三世界國家，成日吼實呢間全球最大流動電話商嘅一舉一動，睇吓幾時俾佢睇中。
噚日印度報紙《FinancialExpress》喺佢哋網站報道，話王總計劃緊踩入印度市場。
報道仲煞有介事咁，搵埋分析員嚟分析，話王總一定要搵個當地拍乸合作發展先有得玩喎。咁王總係咪真係咁講呢？
中移動靚女發言人雷雨好快就以書面白紙黑字幫老細澄清，話王總從冇講過呢番說話。
就係咁，《FinancialExpress》呢段嘢，即刻變成一煲煲唔成嘅冇米咖喱囉！