「等我哋一齊嚟睇吓半場統計……」「曼聯贏車路士1:0，依雯你唔好咁偏心啦！」有睇開英超的朋友應該對以上對白及兩位甜姐兒李依雯、江卓儀的短裙制服不會陌生，不論在家在Bar，她們都陪伴了我們一整年的每個周六日晚上。儘管不少觀眾對她倆趨之若鶩，另一邊廂卻被球迷狂轟「口吃王」，縱使她們高呼「唔再係球壇初哥！」但給她們的突擊測驗，成績仍未如理想呢！
記者：蒙為亮
攝影：王文忠
場地提供：NanoClub（23688169）
江卓儀（Sonia）
理大護理系3年級生，香港沙排代表隊成員，與隊友謝穎紅被稱為沙排Twins，2004、2005年更奪得全國中學生沙排賽冠軍，廣受本地報紙體育版歡迎，現職nowSports評述員。
李依雯
香港理工大學高級文憑課程（夜間）時裝設計畢業，曾任新城電台DJ以及Model，現職nowSports評述員，及於《蘋果日報》和《Am730》撰寫足球專欄。
個人Blog： http://hk.myblog.yahoo.com/yeeman_joey
靚仔C朗Vs爆炸力杜奧巴
常言道：相識、相知、共事都是一種緣份，孖妹入行講波，與本身的職業的確有點風馬牛不相及，一個香港沙排代表隊，一個新城DJ。講波，一切得由零開始。
李依雯=依
江卓儀=江
記者=記
依：由細到大都不太抗拒足球，因為爸爸好鍾意睇，尤其係意甲。當時我已經好鍾意巴迪斯圖達，覺得佢好勁，不過講到話要細心研究都係呢一兩年。
江：原先我對足球都係一竅不通，不過自從做咗now主持後就不斷自我增值。雖然當時喺nowSports主要都係講沙排賽事，真真正正同依雯做Partner係今年嘅事，惟有將勤補拙啦！
依：我就好你少少，做電台嗰時已經同其他DJ講緊波，又做過有線球彩台，不過足球係一種專業，好似我每個星期喺《蘋果》寫專欄，乜都要有根有據，之前要做好多功課。
江：上星期我都有睇你講史高拉利呀！我都認同足球係專業，有啲球迷真係「Data王」乜資料都記得晒，有啲更加可以將全隊利物浦球員跟號碼由正選數到後備，一字不漏背晒出嚟，我哋真係望塵莫及。
依：足球真係有佢嘅魔力，而且個個星期開工都好似開Party咁，真係好開心，自己不知不覺鍾意咗曼聯，最鍾意係C朗啦，有腳法又靚仔。
江：我同你就不嬲打對台，我最鍾意車路士，靚仔無本心呀！我最Like杜奧巴，因為佢爆炸力一流！記得嗰次曼聯對車路士仲差啲鬧交㖭，哈哈，諗番起都覺得搞笑。
突擊測驗
作為英超的足球評述員，應該對各隊有一定程度了解，10條問題，孖妹又答得幾多？
問題
答案
1.尼亞拿
2.希汀克
3.尼爾遜
4.阿仙奴主勝2:1
5.羅賓奴 舒米高等
6.15號
7.艾蒙尼亞
8.十屆
9.意甲
10.基斯坦奴朗拿度
以笑遮醜Vs讀寫障礙
同踢真正足球無異，講波都要有默契，一個靚的撞牆，需要兩位球員經過多次練習，應運而生的就是合拍。眼前的依雯、江卓儀在OnShow時，都要互相補足，以為是對「好姊妹」，誰知她們說是「好兄弟」至啱，有福同享，有鑊同孭！
江：其實，就好似打沙排一樣，一個好拍檔可以幫你補位，合作呢一年入面，我發覺我哋真係好夾，你知成晚流流長，有咩少女心事、工作上開心唔開心都會同佢講，其實依雯就好似我阿哥咁，佢又做過DJ，見識廣，社會經驗豐富過我，幫我解決好多私人問題，Onshow嗰陣我有咩錯失，佢都會幫我勁兜打圓場。
依：你幫吓我，我幫吓你啫，不過我要爆江卓儀係有讀寫障礙……
江：吖，唔好講呀……（作狀打依雯）
依：有一次，江卓儀要朝早返去報足球新聞，有齊稿，仲有份報紙，佢都睇咗成個鐘，先夠膽錄影。
江：平時我都冇事，學校Present都冇口吃，可能Onshow真係特別緊張，你知啦！一Cue都唔錯得嘛！
記：唔係喎，我成日睇你哋都會講錯紅牌、角球，作為觀眾真係唔知好嬲定好笑。
依：寃枉呀，有時唔係我哋講錯，係個Display或者英國當地Count錯臨時修改，所以先有明明寫住兩球、但我哋講咗三球嘅情況出現。
江：因為Earpiece會隨時轉Comment，好似「唔係呀，16個角球至真……」我都係講咗15球啫，惟有講聲唔好意思，改口更正。其實呢份Job真係緊張刺激，極富挑戰性，要隨時執生，少啲專注力都唔得。
依：其實我哋通常都係FreeStyle，無稿勝有稿，𠵱家我哋執生嘅反應，快過以前好多，起碼唔會再有聽到Earpiece，就錯愕到俾大家睇得出。所以以笑遮醜，都係一種技巧。
一個好正Vs一個好靚
在各大討論區，不時都有男人留言：「依雯好正！江卓儀好靚……」或者，間中又會成為Yahoo的熱門搜尋之一，如此多支持者，有沒有試過被熱情Fans追求？她倆異口同聲：「無」！
依：真係連小禮物都未收過，所以我從來都唔覺得多人支持……
江：從來無人會喺門口等放工，而且好多時放工，丁偉傑都會同我一齊走，就算想接我哋放工都唔容易㗎！
依：我哋收工都差不多凌晨五六點啦，邊度有人咁神心！不過有時Blog度都有Fans留一啲鼓勵說話，有時呢啲支持都幾Sweet！
江：一直以來我都覺得做嘢最緊要開心，唔止同依雯，仲同大哥瑜、丁偉傑、榮基都傾得好開心，佢哋仲會經常搞爛Gag，整到我哋成日做做吓節目忍唔住笑，好似有次榮基報道完球賽，交個波畀我哋，佢竟然話：「好，交畀兩位老將！」依雯即刻笑到收唔到聲……
依：仲有一次去緊廣告，大家吹水，講到寵物，大哥瑜話：「你哋就好啦，有得養，我就無咁嘅機會……老婆驚我養狐狸（精）呀！」當時凌晨三點，全廠人即刻笑到肚痛！
後記：
上星期睇英超，依雯和江卓儀依然「蝦碌」，好像都是報錯了角球之類，她們立即發揮TeamWork精神，還吐吐舌笑笑口，就拉扯過去，對於一個標準球迷來說正確的比數固然重要，但必須在雞蛋裏挑骨頭嗎？錯得漂亮，令可人兒霎時一笑也不錯吧！睇波都是一種娛樂，快樂要緊。英超孖妹，奸爸爹！