工聯會旗下「電訊盈科職工總會」篤爆電盈裁員減薪大計，打亂公司瘦身部署，工會將於22號星期日發起大遊行抗議。
電盈另一工會「電盈職員協會」喺事件中一直比較低調，但原來佢哋已經暗中聯絡工聯會，提出合作搞遊行。不過工聯會噚日就請職員協會主席葉岳峰食檸檬，工聯會開會後決定，歡迎葉岳峰以「員工身份」同協會會員參加遊行，婉拒佢哋以職工盟工會名義參加。有工聯會中人同八方講，電盈裁員減薪來勢洶洶，葉岳峰近日先至忽然高調，既然道不同，自然不相為謀。
葉岳峰同八方講，人哋唔歡迎，佢哋會自行部署，佢又話今次提出合作，純粹為員工利益着想，工聯會堅持自己玩，先至係不顧大局。