手提電話係現代人必需品，好多人全天候機不離身，否則魂不附體衰運纏身。工聯會立法會議員黃國健有切身感受，噚日佢同八方講，上星期一搭的士，落車時發現唔見咗部手機，相信係遺留車上，發覺失機後佢即時致電自己手機，可惜機已熄，打極唔通，相信部機已經落入他人手上。
一人失機 多人膽顫
香港每日有無數人遺失手機，黃國健失機真係多一部唔多，加上佢部機用咗年幾兩年，名正言順送舊迎新，弊在黃國健係議員，手機入面好多司長、局長手提電話號碼。黃國健噚日話，好彩暫時冇高官向佢投訴，否則唔知點收科。高官手機號碼外洩後果可大可小，不法之徒招搖撞騙有之，勾線竊聽都話唔定，俾軟硬天師玩吓無傷大雅，好似落選咗嘅美國副總統參選人佩琳咁，中招出醜就千年道行一朝喪。
一人失機，搞到半個政府要陪佢擔驚受怕，黃國健仲自我安慰，話相信就算有人執到佢部手機，都未必會搞搞震，因為佢只輸入官員姓名，冇官職銜頭，「雖然我部電話入面，有曾俊華個電話，但相信市民唔會咁醒啩，見到個名就打畀財爺，香港好多人都叫做曾俊華，一般市民冇咁醒嘅，執到部電話都嗱嗱聲拎去賣啦！」
第二個就好難講，鬍鬚曾近日頻頻出鏡，人氣急升，如果有人將佢個手機號碼大公開，市民實打爆機要求減稅退稅；至於勞工及福利局局長張建宗，亦係高危分子，事關失業率係咁升，搵唔到工嘅人，打畀局長唔知可唔可以快啲有得撈。
好彩冇唔見得人短片
一般人遺失手機都手尾長，流出短片、相片好大鑊，黃國健聲言佢部機只有一張同姪女合照。八方噚日向多個司局長辦公室查詢，發言人都話高官手機近日冇異樣，未發現有人來電滋擾。八方噚日見到「受害人」之一張建宗，佢話對事件好驚訝，但未察覺有人來電玩嘢。工聯會有逾32萬會員，黃國健話唔打算發散人刮部手機，但令高官安心，保皇黨有責，八方奉勸黃國健要三思呀！
mailto:[email protected]