醉駕司機好似過街老鼠全城喊打，鼠王芬自然唔手軟，噚日立法會辯論嚴懲醉駕司機動議，鼠王芬就提出「絕世好橋」。
師承北京捉垃圾蟲
𠵱家新牌仔要掛P牌上路，鼠王芬話可以參照呢個做法，醉駕司機除咗要罰款、扣分，仲要強制喺車上掛一個「D」牌，代表車上司機曾經係drunkendriver，咁做唔單止對司機有阻嚇作用，亦可令其他道路使用者知所警惕，見到D牌就要執生。
聽到呢條橋，八方頓時想起文革時期遊街示眾批鬥場面，被打成反革命分子嘅牛鬼蛇神，要掛個牌上身公開交代認錯。
鼠王芬果然承認此法師承北京，佢話88年參觀北京圓明園時，見到一個學生因為亂丟垃圾，即場斷正俾治安員捉住，然後掛上亂拋垃圾紙牌喺頸度示眾，直至捉到下一個垃圾蟲先可以除牌，佢形容呢種懲罰方式好有阻嚇力而且「好有趣」。鼠王芬關注醉駕，係因為廿年前有好友醉駕出事，飲酒揸車係大殺傷力武器，害人不淺。