港男出身嘅彭冠期，代表作應該係同林保怡傳斷背緋聞，噚日佢喺仲未起好嘅青沙大橋同對手白梓軒為電影《安非他命》拍一場笨豬跳戲。兩位主角冇用替身一take過，jump得好精采，冠期話玩過笨豬跳，加上幫人做過替身，所以冇有怕。
「冇乜唔敢做」
呢部新戲《安非他命》由劉國昌同雲翔再度合作，之前佢哋拍咗部《無野之城》，當中有唔少男主角光脫脫同露屁股嘅鏡頭，又大玩斷背情。今次劉國昌同雲翔食過翻尋味，仲越玩越大，當中有唔少大膽演出，冠期同白梓軒有同性戀情慾纏綿戲，仲露埋何B仔全相任睇，冠期話：「又唔係賣弄色情，好多外國藝術電影都有呢類鏡頭，我冇乜唔敢做，除咗同男同女有床上戲外，仲有場雞姦戲。」
彭冠期近排都算黑仔，之前拍場飛電單車戲跌爆手骨，早排去奧海城睇《赤壁決戰天下》又俾人打爆唇，佢話：「我有鼻敏感，睇戲時鼻敏感發作不斷索鼻，後面個男觀眾就問候（粗口）我，跟住捉咗我出去，大聲話睇住我索K，仲叉住我條頸，打咗我兩巴，打到我嘴唇爆咗流血。我有報警，我一定要告佢傷人，下個月去差館落口供，嗰晚本來要開工，因為呢件事開唔到工，搞到電影公司損失差唔多10萬，真係當黑。」
