花旗股市前晚大插水，港股噚日先跌後升，有70點進賬，算係大步檻過，不過，花旗個勢唔係好掂，港股隨時會再被佢拖低，大家入市都係要審慎啲。
奧巴馬噚晚公佈針對減少斷供個案嘅措施，不過呢兩日已經預先放咗好多料畀傳媒，按呢啲資料嚟睇，個方案唔係好掂。除此之外，通用汽車同班債權人以及工會仲未傾掂數，隨時又會成為淡友沽貨嘅藉口。
鞍鋼C輪14997：鞍鋼（347）昨收7.40元，升1.7巴仙，股價跌近條100日線回升，技術走勢算係轉穩，股價受追捧，應該同中央振興鋼鐵業方案就嚟公佈有關，股價有機會炒上8元，破位睇8.50元，可以諗吓隻C輪14997，昨收14.8仙，有效槓桿2.7倍，正股升上8.60元，14997可見22仙，正股跌穿6.80元，就沽咗隻輪止蝕。
俊樺