星期日賽馬，左丁山如常捧場，喺馬場正門，竟然碰到非常少見之稀客，就係三位民主派議員何俊仁、李華明與張文光，穿着整齊西裝，仲整齊過到立法會開會，張文光手揸一本書，不是馬經，聽講係馬會大董范太在七樓董事廂房請客，佢哋一齊赴會。范太在立法會有人緣，退出議事廳之後，獲選為馬會董事，如果人在香港嘅話，有義務在個個賽馬日請客。諗深一層，范太係人大常委，趁邀請泛民派議員到馬場睇跑馬，吃自助餐之便，傾吓馬經，講兩三句政治，方便之至，如此這般與泛民溝通，勝過在中環安排飯局。猶有甚者，泛民派議員對養馬多數矇查查（黃毓民議員例外），范太向佢哋講吓馬會點樣營運做善事，泛民派就唔會以為馬會只等於博彩啦。
入到廂房坐低，有人行埋嚟拍膊頭，抬頭一望，竟然又係一位稀客，就係大編輯阿仁哥，仁哥話同班中學同學到馬場一敍，問有乜必贏貼士，隨口講咗「愛心大使」、「六六精英」，點知輸到碌地，算仁哥唔好彩。
跑馬之後，建築邦話知道大學站有一間新酒店已經開門做生意，算係softopening，已訂下晚上自助餐，於是一齊去試新嘢，呢間就係香港沙田凱悅酒店，將來還有一間位於尖沙咀河內道之香港尖沙咀凱悅，同是新世界集團經營。沙田呢一間係與中文大學合作嘅，中大酒店系學生可在此實習。
自助餐一啲都唔便宜，連加一要收四百蚊，相等於市區五星酒店嘅收費，但呢度又幾好生意噃，咖啡室坐滿晒人，相信係沙田大埔一帶嘅朋友聞風而至之故。沙田本已有兩間酒店，初開張時餐飲生意好好，經常爆滿，但香港有好多餐廳唔係與時俱進，越做越好嘅，而係小時了了，大未必佳，故此沙田凱悅如果能夠維持高水準，生意應該不愁，起碼科學園與大埔工業邨嘅商家會係常客，康樂園九肚山之豪宅業主亦係。建築邦食完，甚表滿意，話會再嚟，不過佢都係鍾意中菜多啲，詢問之後，知道沙田凱悅中菜廳會大概在三月底開張，會有東莞名廚及北京君悅烤鴨師傅坐鎮喎。