全城聚焦東亞銀行（023）成績表，在環球金融海嘯影響下，當然係市場預期下限。東亞純利大跌99%，僅得3900萬元。
盤數咁曳，東亞照樣派息，股息只得0.02元，但10送1紅股，留住股東之心可謂良苦。不過，以一手200股計，每手收息得4元，買份報紙都未夠。如果散戶只係揸住十手八手，收埋息都未必夠證券行扣手續費，即使他朝沽埋贈送之紅股，由於好大機會係碎股，要比市場價沽低好多格，而且又要畀經紀佣，亦係未必有着數。
銀行股業績揭開序幕，家陣有東亞做「辦」，短期好難說服到自己炒銀行股。另一角度睇，如果呢次成績表係「最壞情況」，低吸持中長線應有一定贏面。
公佈業績前觀望
中銀香港（2388）近日走勢疲弱，估計公佈業績前都難有起色，暫宜觀望，後市料將考驗低位7.33元，若跌近該水平，到時可考慮吸納。
方星俠