某日在家找資料發現有個Blog叫「向晴朗的一天出發」，還以為是電台宣傳手法，Click入原來是商台粉絲Anson爸爸，仔仔名陳朗玩食字，於是倒過來吸引商台訪問他，爸爸說得簡單：「記錄仔仔點滴，希望一家人每天都『在陳朗的一天出發』。」
記者：林佩婷
攝影：陳陶鈞
仔仔印記超多Fans
Anson05年始寫Blog，但一直不大Update，直到太太Bonnie懷孕，Anson才智生現在這個Blog名，甚至乎未知BB性別便已決定用「朗」字帶正面訊息。往後的日子，寫Blog變得積極，希望仔仔日後看回自己的成長印記。「先係自己嘅家人成為Fans，之後連大家嘅同事、甚至新Blog友都日日追。偶然唔得閒Update，都俾人追問點解唔寫！」
抵死對白最火熱
截至訪問當日，有關陳朗的Blog文約百篇，相片更不計其數，但最特別還是Anson為陳朗跟表哥設計的連環圖對白。「表哥大陳朗兩個月，我當佢係大仔。佢哋第一次見面我猛影相，後嚟睇番啲相先靈機一觸諗到對白。唔知係咪阿仔覺得表哥大大隻好可怕，一見佢想撲埋嚟就大喊，更增加寫對白靈感。每逢表哥表弟連環圖系列出街，反應必超熱烈。」觀乎一件簡單的學行事件都變成兩表兄弟的內心獨白，笑死Blog友。
大型生日會最花心思
陳朗1月1日出世，Anson對「1」最敏感，決定在他1歲生日大搞。「我半年前已着手準備，最初諗住喺Cafe搞，點知去完表哥個生日會發現得兩個職員嘢又唔算好食，就決定喺屋企搞。仲整埋入場簽名卡、全家福立體感謝卡、幅牆貼滿仔仔12個月以嚟嘅生活相、食物由妹妹負責……」如此這般，這個生日派對未計天台約500呎的家，竟塞滿50人！親友、Blog友加七八個BB。「超熱鬧超成功。」是Anson爸爸的結語。
6萬裝備影靚相
以前Anson跟Bonnie見到靚衫就盡情買，現時則以陳朗的必需品為先，除了──相機。「以前用普通相機，自仔仔出世後發現根本捉唔切佢嘅反應，於是買部大機。初初連快門光圈都唔識，不斷上網學又係咁試影，好快上手。最近發現淨影相唔夠，換過部影相連拍片嘅，希望拍得更好。」短短1年花了6萬多買攝影器材，每月Anson更會做一張紀念攝影精華特集。除了網誌外，Anson更特設仔仔「一日一相」，放上每天他精心捕捉的仔仔特寫，作為更準確的成長記錄。
想欣賞Anson爸爸為仔仔陳朗寫的Blog文，又或分享湊仔心得，可Click入以下網址。最特別他設「一日一相」，每日放張陳朗的生活照。
AnsonBlog： http://hk.myblog.yahoo.com/anson_yin02/
一日一相： http://hk.myblog.yahoo.com/jan1st08
