鹹豬手重現江湖，女星個個敢怒不敢言，袁彌明（Erica）坦言：「班女藝人都慣咗俾人博懵！呢啲古仔都流傳咗好多年啦，叫佢哋出嚟指證又無人敢講，抵俾人博懵㗎！」食得鹹魚抵得渴，Erica大呻鏡頭前後都俾人抽水，「做獎門人喺二百幾萬觀眾面前又係咁，私底下監製叫你飲嘢，借故又抽水，我惟有一手推開佢！」咁多委屈，一於化悲憤為食量，大啖咬鹹豬手洩憤！
記者：吳允冲
攝影：譚盈傑
Hair：Martin@Hair
Wardrobe：ShanghaiTang
比利時
燒豬手3大特質
皮脆：豬皮烤得脆身，有厚度所以稍硬。
肉質：非常濕潤，富膠質，肉味甘香，但有點膩滯。
味道：牛肉醬汁肉味香濃，滲出蔬菜甜味，味濃偏甜。
「塊皮好脆有啲似乳豬，個汁好有肉味，入面啲肉嫩到痹，有水份，再加埋啲汁，一啲都唔鹹，真係好好味！而且焗出嚟的豬手唔係好肥。」
比利時豬手德法混種
電視城鹹豬手人人避之則吉，連美食鹹豬手，Erica都話怕怕︰「大大份又要配啤酒，成件事都唔啱中國人，睇落好似好惹味，但炸出嚟唔健康。」直至皮脆肉嫩鹹豬手端上枱，她才一改想法：「嘩！好正﹗『鹹豬手』絕對係一個有誤導成份的譯名，聽落個名以為好鹹，要飲啤酒冲淡鹹味，其實絕對唔係，真係改錯名。」比利時的豬手，入口不鹹反而有一點甜味，大廚話原因在於醬汁，「比利時剛好在德國和法國中間，飲食文化受到兩個國家的影響，豬手雖然來自德國，但法國人愛用sauce，所以比利時的豬手都加有醬汁。」以牛肉、牛骨熬成的醬汁，加有紅酒及蔬菜，略帶甜味。豬手底下墊有菜頭和薯仔，吸盡豬油和醬汁，特別好味。
一桶青口6種煮法
說到比利時名菜，不能錯過的還有青口鍋。來自澳洲的青口可揀6種方法炮製，當中以「Hoegaarden」香草啤酒汁及「Mariniere」白酒蒜頭汁兩種最地道，平日愛吃泰國菜的Erica就鍾意「OrientalStyle」有椰汁、香茅的東方味道，食完一隻又一隻。看見韃靼牛肉，她又雙眼發光，「我最鍾意食牛肉，生熟都照食，如果叫我放棄牛肉就生不如死。」看她完全沒有減肥的顧慮，密密食毫不造作，果然是敢吃敢為。
敢食生牛肉
韃靼牛肉$175/大、$95/小
「似食生漢堡包，入面有茄汁、洋葱、香料，生牛肉有啲羶味，一般香港人應該唔係好敢食。」吃前將辣椒粉及酸瓜混入牛肉，愛吃酸辣可加Tabasco及喼汁，再塗上多士上，味道更複雜。
嫩到不得了！
青口鍋$310/1kg$175/0.5kg
「好食！我成日嫌青口無味，但佢整到椰汁味入晒落青口裏面，食到尾最緊要用麵包點埋啲汁食。」吃時連叉都唔使用，用空殼將青口肉拑出嚟就得。
Frites（21795179）
中環皇后大道中74號皇后中心1樓
德國豬手日賣百隻
德國鹹豬手唔難煮，但準備時間要三日咁長！首先用鹽醃、再用水慢火浸、最後入爐烤，才能做出入味、肉嫩、皮脆的正宗鹹豬手。咁都唔止，大廚透露仲有一個秘訣，就係噴德國啤酒，先可以令豬皮香又帶甜。一公斤重的豬手，真係唔容易消化，德國人喜伴以酸得人牙關打震的酸椰菜，中和豬肉的膩滯。食德國菜，份量大得驚人，最好與一大班朋友分享，一人一杯啤酒，才夠豪氣，才有氣氛﹗
德國燒豬手3大特質
皮脆：薄脆的豬皮烤得異常鬆化，像乳豬皮但完全不油。
肉質：亁身得來有肉汁，嫩滑不嚡口，似火腿。
味道：醃得非常入味，帶鹹香，沒有醬汁，可配芥末同吃。
德國腸拼盤伴燒薯、酸椰菜及薯仔沙律$205（2-3位用）
五款香腸全部都係來自德國，以紅色幼身的芝士腸最為惹味。
必飲啤酒
吃德國菜怎可以沒有正宗德國啤酒？大杯酒大塊肉咁先有德國風味﹗
KingLudwig（23698328）
尖沙嘴梳士巴利道港鐵尖東站地面32號舖