一場金融海嘯，令好多人開始反思人生嘅意義。球壇中人卻坐住大郵輪，繼續追逐權力與金錢，不過25歲阿仙奴球星伊度亞度達施華（下稱達施華）嘅重生故事，卻為紙醉金迷嘅球壇，傳來一響禪院鐘聲。
51個禮拜前嘅08年2月23日，阿仙奴聯賽作客伯明翰，前鋒達施華開賽2、3分鐘，就被馬田泰萊踢斷左腳腓骨。呢位巴西裔克羅地亞國腳，望住斷開兩截嘅小腿一臉恐懼，好快陷入昏迷。朦朧之際，佢被推入伯明翰醫院救治，之後開始慘痛嘅康復療程。
助兵工廠大炒卡城
呢一年地球照轉，京奧、金融海嘯等大事先後發生，但達施華卻一心為康復而努力，結果喺家人同體能教練鼓勵下，本月11日再度替克羅地亞上陣。周一英足盃第4圈重賽主場對卡迪夫城，達施華重披阿仙奴球衣，梅開二度助球隊大勝4:0。「呢個係一生最美妙嘅晚上，因為證明自己仲可以喺高水準比賽競逐。」達施華29分鐘用頭槌頂入1:0，「我的確喊咗，因為實在太感動！我錫一錫結婚戒指，以答謝老婆、女兒同家人嘅支持。」60分鐘佢射入12碼後，衝向場邊與體能教練高拔擁抱。
雲格：佢係明星
67分鐘，達施華離場由尹佩斯入替，阿聯酋球場嘅主隊球迷，同埋阿仙奴領隊雲格一齊拍手致意。雲格講：「達施華係今晚嘅明星，佢意志力過人，唔係根本冇今日。」佢仲透露高拔呢年見達施華嘅時間，仲多過見自己老婆，入完波唔攬埋一齊先奇！
達施華神勇復出刺激阿仙奴士氣，英足盃更被足智彩列為第3熱門（見附表）。阿仙奴第5圈對般尼，如果贏埋8強將對錫菲聯或侯城勝方，對手實力好一般，加埋隊長法比加斯10日後復操，俄羅斯富豪尤曼諾夫增持股份至25%，雲格飲得杯落啦！
英足盃8強對碰表
布力般流浪（28倍）/高雲地利（150倍）vs車路士（3.6倍）
史雲斯（125倍）/富咸（28倍）vs曼聯（2.9倍）
阿仙奴（4.7倍）/般尼（100倍）vs錫菲聯（125倍）/侯城（34倍）
愛華頓（5.5倍）vs韋斯咸（28倍）/米杜士堡（30倍）
註：前者主場
（）為足智彩奪標賠率
截至：17/02
賽事於07/03、08/03舉行