任總早排先話驚外資會因為救阿媽，要班資回朝撤走資金，喺咁嘅陰霾下，炒外滙嘅外資公司盈豐財資市場（CMCMarkets）就喺星期二，突然收到英國總公司通知，要關閉香港業務。CMC喺香港嘅8個員工全部被裁，好在佢哋會獲得高於勞工法例嘅賠償。
8名員工全線被裁
CMC發言人話，佢哋喺香港已經4年，主要經營槓桿外滙交易產品嘅市場推廣業務；而有關落盤同客戶服務都喺澳洲進行。佢話集團一直想拓展其他金融產品業務，但礙於香港金融監管環境，遲遲未揸定主意，所以先執咗香港業務。不過本港客戶可以繼續透過網上買賣，一切由澳洲方面支援喎。
有位CMC客仔噚日朝打過電話去CMC問究竟發生乜事，仲問到明係咪有監管機構施壓。
職員同佢講，話今次只係行政決定，因為喺香港淨係做外滙冇乜前景，所以索性摺咗佢。睇嚟唔知CMC對客仔講真話，定係對傳媒講真話嘞？
CMC一名員工就話，公司舊年賺大錢，相信關閉香港業務同財政無關，仲問華華知唔知邊度請人。